सोलापूर,दि.१: भारत सरकारच्या ‘जनगणना २०२७’ या महत्त्वपूर्ण मोहिमेचा श्रीगणेशा आज, १ मे पासून होत आहे. या मोहिमेत प्रथमच नागरिकांसाठी ‘स्वगणना’ (Self-Enumeration) ही विशेष डिजिटल सुविधा उपलब्ध करून देण्यात आली असून, सोलापूरकरांना आता घरबसल्या आपली माहिती नोंदवता येणार आहे.
महापालिका आयुक्त तथा प्रधान जनगणना अधिकारी डॉ. सचिन ओम्बासे यांनी दिलेल्या माहितीनुसार, ही ऑनलाइन नोंदणी प्रक्रिया १ मे ते १५ मे २०२६ या मर्यादित कालावधीतच उपलब्ध असेल.
नोंदणी कशी करावी?
नागरिकांनी जनगणनेच्या अधिकृत पोर्टलवर जाऊन ही प्रक्रिया पूर्ण करायची आहे:
• अधिकृत पोर्टल: https://se.census.gov.in वर भेट द्या.
• लॉगिन: आपल्या मोबाईल क्रमांकाद्वारे लॉगिन करा.
• स्थान निश्चिती: नकाशावर आपल्या घराचे अचूक लोकेशन निवडा.
• माहिती भरणे: कुटुंबातील सदस्यांची आवश्यक माहिती भरा.
‘एसई आयडी’ (SE ID) का महत्त्वाचा?
ऑनलाइन प्रक्रिया यशस्वीपणे पूर्ण केल्यानंतर प्रत्येक कुटुंबाला एक युनिक ‘एसई आयडी’ (Unique SE ID) मिळेल.
लक्षात ठेवा: १६ मे ते १४ जून २०२६ या काळात जेव्हा प्रगणक (Enumerators) प्रत्यक्ष तुमच्या घरी येतील, तेव्हा त्यांना हा ‘एसई आयडी’ दाखवणे अनिवार्य आहे. यामुळे तुमचा आणि प्रगणकांचा वेळ वाचेल.
स्वगणनेची वैशिष्ट्ये:
• वेळेची बचत: संपूर्ण प्रक्रिया पूर्ण करण्यासाठी केवळ १५ ते २० मिनिटे लागतात.
• बहुभाषिक सुविधा: मराठी, हिंदी, इंग्रजीसह एकूण १६ प्रादेशिक भाषांमध्ये माहिती भरता येईल.
• ड्राफ्ट पर्याय: माहिती अपूर्ण असल्यास ती ‘Save as Draft’ करून नंतर पूर्ण करण्याची सोय आहे.
“जनगणना ही राष्ट्रीय विकासाचा पाया आहे. स्वगणना सुविधेमुळे ही प्रक्रिया अधिक अचूक आणि पारदर्शक होणार आहे. सोलापूरच्या जास्तीत जास्त नागरिकांनी या डिजिटल मोहिमेत सहभागी व्हावे,” असे आवाहन आयुक्त डॉ. सचिन ओम्बासे यांनी केले आहे.
