छत्रपती संभाजीनगर,दि.४: नागपूरहून वाशिमच्या दिशेने जाणाऱ्या दोन वाहनांवर (Vehicle) अज्ञात समाजकंटकांनी दगडफेक (Stone pelting) केल्याची धक्कादायक घटना समोर आली आहे. छत्रपती संभाजीनगरच्या हद्दीतील करमाड (Karmad) परिसरात रविवारी रात्री दहा वाजण्याच्या सुमारास ही घटना घडली.
काय आहे नेमकी घटना?
कार मालक परमेश्वर पंजरकर हे आपली अर्टिगा कार (एमएच २० जीई २१६२) आणि हायवा ट्रक (एमएच ४० सीडी ५७३५) घेऊन नागपूरहून वाशिमच्या मार्गाने प्रवास करत होते. दरम्यान, करमाड परिसराजवळ आल्यावर ६ ते ७ जणांच्या झुंडीने या दोन्ही वाहनांवर अचानक दगडफेक केली. या हल्ल्यामध्ये कार आणि ट्रकच्या समोरील काचा फुटल्या. या जीवघेण्या हल्ल्यानंतरही कार चालकाने प्रसंगावधान राखत गाडी थांबवली नाही आणि थेट जालना इंटरचेंज गाठले, तिथे पोहोचल्यानंतर त्यांनी तातडीने पोलिसांना (Police) फोन करून घटनेची माहिती दिली. पीडित कार मालकाच्या तक्रारीवरून मंगळवारी करमाड पोलीस ठाण्यात (Police station) गुन्हा नोंदवण्यात आला आहे.
पोलिसांची गस्त कागदावरच?
रोखे आणि लुटमारीच्या (Robbery) घटनांना आळा घालण्यासाठी महामार्गावर ८ पोलीस वाहने नियमित गस्त (Patrolling) घालत असल्याचा दावा केला जातो. मात्र, असे असतानाही चालकांवरील हल्ल्यांचे सत्र थांबायला तयार नाही.
भयंकर आकडेवारी: ६ महिन्यांत ८ वेळा दगडफेक आणि ५ वेळा लुटमारी
समृद्धी महामार्गावर गेल्या सहा महिन्यांत ८ मोठ्या दगडफेकीच्या तर ५ लुटमारीच्या घटना नोंदवल्या गेल्या आहेत.
विशेष म्हणजे, केवळ करमाड परिसरातील चॅनेल क्रमांक ३९७ आणि ४५१ दरम्यान गेल्या ८ दिवसांत दगडफेकीच्या २ घटना घडल्या आहेत.
यापूर्वी लुटमारीच्या ५ प्रमुख घटना घडल्या आहेत; ज्यामध्ये १२ मे रोजी वैजापूर हद्दीत, २८ जुलै रोजी सिंदखेड राजाजवळ टायर पंक्चर करून केलेली लुटमार, तसेच १५ ऑगस्ट, २८ ऑगस्ट आणि २ नोव्हेंबर रोजी घडलेल्या घटनांचा समावेश आहे.
याशिवाय, सोमवारीच पिस्तूल आणि चोपाचा धाक दाखवून मुंबईकडे (Mumbai) जाणाऱ्या इनोव्हा कारमधील एका अभियंत्याची रोकड लूट झाल्याची घटनाही समोर आली आहे.
पोलिस यंत्रणेने (Police department) या गुन्हेगारांवर कठोर कारवाई करावी, अशी मागणी प्रवाशांमधून केली जात आहे.
