मेरठ,दि.४: उत्तर प्रदेशमधील (Uttar Pradesh) मेरठ (Meerut) येथे एक अत्यंत दुःखद आणि खळबळजनक घटना समोर आली आहे. भारतीय जनता पक्षाचे (BJP) मंडल उपाध्यक्ष राजीव गुप्ता यांच्या २६ वर्षीय तरुण मुलाने (Son) पत्नीच्या मानसिक त्रासाला आणि जाचाला कंटाळून विषारी पदार्थ सेवन करून आपले आयुष्य संपवले (Suicide). मृत्यूपूर्वी त्याने एक व्हिडिओ रेकॉर्ड केला होता, ज्यामध्ये त्याने आपल्या मृत्यूसाठी पत्नीलाच थेट जबाबदार धरले आहे.
नेमकी घटना काय?
गाझियाबाद (Ghaziabad) येथे खाजगी कंपनीत (Private Company) नोकरी करणाऱ्या प्रवल गुप्ता याचा विवाह गतवर्षी म्हणजेच २ नोव्हेंबर २०२५ रोजी स्नेहा गुप्ता हिच्याशी झाला होता. मात्र, लग्नानंतर अवघ्या काही महिन्यांतच दोघांच्या संसारात वाद सुरू झाले. प्रवलच्या कुटुंबीयांच्या म्हणण्यानुसार, त्याची पत्नी स्नेहा आणि तिच्या माहेरकडील मंडळींकडून त्याचा सातत्याने मानसिक छळ (Mental Harassment) केला जात होता. या सगळ्या प्रकारामुळे प्रवल प्रचंड नैराश्यात (Depression) होता. अखेर तो कँट परिसरात बेशुद्धावस्थेत आढळल्यानंतर त्याला तातडीने रुग्णालयात (Hospital) दाखल करण्यात आले, परंतु उपचारादरम्यान त्याचा मृत्यू झाला.
मृत्यूपूर्वीच्या व्हिडिओतील खळबळजनक आरोप
जीवन संपवण्यापूर्वी प्रवलने एक व्हिडिओ बनवला होता, जो आता सोशल मीडियावर आणि पोलिसांच्या हाती लागला आहे. या व्हिडिओमध्ये त्याने म्हटले आहे की:
लग्न झाल्यापासून त्याला व त्याच्या आई-वडिलांना सतत मानसिक त्रास (Mental Torture) दिला जात होता.
पत्नी त्याची आई आणि बहिणीशी गैरवर्तन करत असे.
३१ ऑक्टोबर रोजी पोलीस लाईन्समधील कौटुंबिक समुपदेशन केंद्रामध्ये (Family Counseling Center) समुपदेशनादरम्यान पत्नीने त्याच्यावर अत्यंत खोटे आणि गंभीर आरोप केले होते, ज्यामुळे तो आणखीनच खचला होता.
कुटुंबाचा आक्रोश
या दुर्दैवी घटनेनंतर भाजप नेते व प्रवलचे वडील राजीव गुप्ता यांना तीव्र मानसिक धक्का बसला आहे. “गतवर्षी आजच्याच दिवशी मी माझ्या मुलाची वरात मोठ्या थाटामाटात घेऊन गेलो होतो, आणि आज बरोबर वर्षभरानंतर मला त्याची अंत्ययात्रा काढावी लागत आहे,” असे म्हणत त्यांनी हंबरडा फोडला.
दुसरीकडे, प्रवलची आई किरण गुप्ता यांनी आरोप केला की, सून घरात कोणतेही काम करत नसत, तासनतास फोनवर बोलत राहायची आणि वेगळे राहण्यासाठी सातत्याने दबाव टाकत होती. शोकाकुल कुटुंबाने आता पोलीस प्रशासनाकडे (Police Department) याप्रकरणी कठोर कारवाईची आणि दोषींना कडक शिक्षा देण्याची मागणी केली आहे.
