लखनौ,दि.११: भगवान श्रीरामांनी अग्निपरीक्षेनंतरही माता सीतेचा त्याग केला होता, त्यामुळे मी अयोध्येतील राम मंदिरात कधीही जाणार नाही, असा ठाम पवित्रा तृणमूल काँग्रेसचे (TMC) खासदार आणि माजी क्रिकेटपटू कीर्ती आझाद (Kirti Azad) यांनी घेतला आहे. समाजवादी पक्षाचे अध्यक्ष अखिलेश यादव यांनी राम मंदिराच्या भेटीबाबत वक्तव्य केल्यानंतर आझाद यांचे हे विधान समोर आले असून, यावरून आता राजकीय वर्तुळात नवा वाद पेटला आहे.
आपल्या या निर्णयामागील भूमिका मांडताना कीर्ती आझाद यांनी माता सीतेबद्दलची तीव्र निष्ठा व्यक्त केली. ते म्हणाले, “माझा संबंध मिथिला (Mithila) भूमीशी आहे. माता सीता ही मिथिलेची लेक असून आमच्यासाठी ती आईसमान आहे. प्रभू रामाने घेतलेली अग्निपरीक्षा (Agni Pariksha) सीतेने यशस्वीरीत्या पार पाडली होती. तरीसुद्धा दोन लहान निष्पाप बालकांसह तिला घरातून बाहेर काढण्यात आले. ज्या ठिकाणी माझ्या आईवर एवढा मोठा अन्याय झाला, तिथे मी पाऊल कसे ठेवू? याला मर्यादा पुरुषोत्तम (Maryada Purushottam) म्हणायचे का? मी माझ्या भावी पिढीला काय उत्तर देऊ?”
आपल्या धार्मिक आस्थेचा दाखला देत त्यांनी स्पष्ट केले, “आपल्या देशात ३,२०० कोटी देवी-देवता आहेत, मग केवळ श्रीराम हेच एकमेव देव आहेत का? मी कामाख्या (Kamakhya), दक्षिण काली (Dakshina Kali), कालीघाट तसेच दिल्लीतील गोल मार्केटमधील काली मंदिरात नेहमी दर्शनाला जातो. माझ्या वडिलांप्रमाणेच मीही देवीचा निस्सीम भक्त आहे. या पवित्र मंदिरांमध्ये पूजा-अर्चा केल्यावर माझी हिंदू (Hinduism) असण्याची ओळख सिद्ध होत नाही का?”
मिथिलेच्या प्रत्येक नागरिकाने माता सीतेच्या सन्मानासाठी आणि हक्कासाठी ठामपणे उभे राहिले पाहिजे, असे आवाहन करत त्यांनी अयोध्येतील राम मंदिरात न जाण्याच्या आपल्या निर्णयाचा पुनरुच्चार केला.
