मुंबई,दि.८: राष्ट्रवादी काँग्रेसचे (NCP) अध्यक्ष शरद पवार यांना मुंबईतील ब्रीच कँडी रुग्णालयात (Breach Candy Hospital) दाखल करण्यात आल्यानंतर प्रफुल पटेल यांनी त्यांची भेट घेतली होती. काही दिवसांपूर्वी रुग्णालयात या दोन्ही नेत्यांमध्ये झालेल्या चर्चेमुळे राजकीय वर्तुळात (Political Circles) चर्चांना उधाण आलं होतं. या भेटीत राष्ट्रवादी काँग्रेसच्या दोन्ही गटांच्या विलीनीकरणावर (Merger) चर्चा झाल्याची कुजबूज सुरू झाली होती. पक्षातील फुटीनंतर (Split) अजित पवारांची साथ देणाऱ्या प्रफुल पटेल यांनी केंद्रीय गृहमंत्री अमित शहा यांच्यानंतर थेट शरद पवारांची भेट घेतल्याने अनेकांच्या भुवया उंचावल्या होत्या. अखेर या भेटीवर प्रफुल पटेल यांनी आपली पहिली प्रतिक्रिया (First Reaction) देत विलीनीकरणाच्या सर्व चर्चा फेटाळून लावल्या आहेत.
प्रफुल पटेल आणि शरद पवार यांच्या भेटीचा एक व्हिडिओ (Video) सोशल मीडियावर मोठ्या प्रमाणात व्हायरल (Viral) झाला होता. यामध्ये दोन्ही नेते बराच वेळ संवाद साधताना दिसले. विशेष म्हणजे, या व्हिडिओमध्ये १० तारखेला पुन्हा भेटणार असल्याचा उल्लेख ऐकू येत असल्याने, त्या बैठकीत विलीनीकरणावर अंतिम चर्चा होणार का, असे तर्कवितर्क (Speculations) लढवले जात होते. मात्र, या सर्व चर्चांमध्ये कोणतेही तथ्य नसल्याचे पटेल यांनी स्पष्ट केले आहे.
या संदर्भात स्पष्टीकरण देताना प्रफुल पटेल म्हणाले की, “शरद पवार रुग्णालयात दाखल होते. मला अनेक वर्षे त्यांच्यासोबत काम करण्याची संधी मिळाली असून त्यांचे आशीर्वाद नेहमीच लाभले आहेत. त्यामुळे केवळ त्यांच्या तब्येतीची विचारपूस (Health Update) करण्यासाठी मी रुग्णालयात गेलो होतो. खूप चांगल्या वातावरणात ही भेट झाली. ईश्वराच्या कृपेने त्यांची प्रकृती आता बरी असून ते घरी परतले आहेत. भेटल्यानंतर थोडीफार चर्चा होणे स्वाभाविक आहे, पण त्यात काही विशेष नव्हते.”
१० तारखेच्या भेटीच्या उल्लेखावर बोलताना पटेल पुढे म्हणाले, “दिवाळीनिमित्त मी ८ आणि ९ तारखेला गोंदियात असतो, हे साहेबांनाही माहीत आहे. त्यामुळे १० तारखेनंतर मी मुंबईत आल्यावर त्यांची भेट घेण्याचा प्रयत्न करेन, एवढंच आमचं बोलणं झालं. रुग्णालयात फार काही बोलता येत नाही आणि तिथे राजकीय चर्चा करणे योग्यही नव्हते. रुग्णालयात आम्ही विलीनीकरणाची चर्चा करणार आहोत का? पवार साहेबांप्रति आमच्या मनात आदर होता, आहे आणि सदैव राहील. त्यांची प्रकृती उत्तम राहावी, हीच सर्वांची इच्छा आहे. १० तारखेला मुंबईत आल्यावर भेटू इतकंच मी म्हटलं आहे; पण ही भेट राजकीयच असेल असं काही नाही.”
