मुंबई,दि.१०: कोकणातील रायगड जिल्ह्यात महायुतीमधील अंतर्गत संघर्ष आता टोकाला पोहोचला असून, शिवसेना विरुद्ध राष्ट्रवादी काँग्रेस असा उघड सामना सुरू झाला आहे. या वादात आता शिवसेनेचे ज्येष्ठ नेते रामदास कदम यांनी उडी घेत राजकीय वर्तुळात खळबळ उडवून दिली आहे. ऐन दिवाळीच्या तोंडावर कदमांनी राष्ट्रवादीचे नेते सुनील तटकरे यांच्यावर अत्यंत गंभीर आणि खळबळजनक आरोप करत थेट अजित पवारांच्या अपघाती मृत्यूशी त्यांचा संबंध जोडला आहे. या प्रकरणात सुनील तटकरे यांची सखोल चौकशी करण्यात यावी, अशी खळबळजनक मागणी कदमांनी केली आहे.
‘त्यांना उपमुख्यमंत्री व्हायचं होतं…’; रामदास कदमांचा थेट निशाणा
सुनील तटकरे यांच्या कार्यपद्धतीवर आणि महत्त्वाकांक्षांवर टीका करताना रामदास कदम यांनी अत्यंत जहरी शब्दांत हल्ला चढवला. कदम म्हणाले की, “तटकरे हे एकेकाळी अंतुले साहेबांचे पीए होते आणि त्यांनीच अंतुले साहेबांना संपवलं. जो जो व्यक्ती तटकरेंना जवळ करतो, त्यालाच संपवण्याचं काम ते करतात. त्यांना स्वतःला राज्याचं उपमुख्यमंत्री व्हायचं होतं, अशी चर्चा माझ्या कानावर आली आहे. त्यामुळे अजितदादांच्या घातपातामागे यांचाही काही हात होता का, या दिशेने तपास होणं गरजेचं आहे. त्यांची महत्त्वाकांक्षा अत्यंत राक्षसी असून ती पूर्ण करण्यासाठी ते कोणत्याही थराला जाऊ शकतात.”
आरोप-प्रत्यारोपांच्या फैरी आणि राजकीय प्रतिक्रिया
सुनील तटकरेंचे प्रत्युत्तर: रामदास कदम यांनी केलेले सर्व आरोप सुनील तटकरे यांनी पूर्णपणे फेटाळून लावले आहेत. आपल्यावरील आरोप हे धादांत खोटे आणि बिनबुडाचे असल्याचं स्पष्टीकरण त्यांनी ‘एबीपी माझा’शी बोलताना दिलं. तसेच, या सर्व आरोपांना पत्रकार परिषद घेऊन सडेतोड उत्तर देणार असल्याचंही तटकरेंनी स्पष्ट केलं आहे.
राष्ट्रवादीची भूमिका: या वादावर बोलताना राष्ट्रवादीचे प्रवक्ते उमेश पाटील यांनी कदमांचे आरोप फेटाळले. “रामदास कदम यांनी यापूर्वीही असे अनेक आरोप केले आहेत. तटकरे गेल्या ४० वर्षांपासून कोकणात शिवसेनेविरोधात लढत पक्ष वाढवत आहेत. त्यामुळे हा केवळ स्थानिक पातळीवरील राजकीय संघर्ष आहे,” असे पाटील म्हणाले.
काँग्रेसची उडी: महायुतीतील दोन मित्रपक्षांमधील या भांडणात आता विरोधकांनीही उडी घेतली आहे. काँग्रेस नेते विजय वडेट्टीवार यांनी या प्रकरणाची गंभीर दखल घेत, जर रामदास कदम इतके मोठे आरोप करत असतील, तर या संपूर्ण प्रकरणाची आणि स्वतः रामदास कदमांचीही चौकशी झाली पाहिजे, अशी मागणी केली आहे.
खुर्चीच्या वादातून सुरू झालं ‘नाट्य’, मेव्हण्याचा थेट इशारा
या संपूर्ण वादाची ठिणगी खेडमधील पोयनार धरणाच्या भूमिपूजन कार्यक्रमात पडली होती. या कार्यक्रमात खुर्चीवरून झालेला अपमान सुनील तटकरे यांचे मेव्हणे आणि जिल्हा परिषद सदस्य अजय बिरवटकर यांच्या चांगलाच जिव्हारी लागला आहे. या घटनेनंतर बिरवटकर यांनी सोशल मीडियावर एक पोस्ट शेअर करत रामदास कदमांना थेट इशारा दिला आहे.
“माणसाला उतरती कळा लागली की अशीच आगपाखड सुरू होते. आमची आभाळ गाठण्याची जिद्द असली, तरी पाय नेहमी जमिनीवरच राहतील. मात्र, जर कोणी स्वाभिमानाला ठेच पोहोचवण्याचा प्रयत्न केला, तर त्यांचा बाजार उठवला जाईल,” अशा आक्रमक शब्दांत बिरवटकर यांनी सुनावले आहे. एकूणच, या घडामोडींमुळे कोकणातील महायुतीमधील दरी आणखी रुंदावली असून आगामी काळात तटकरे विरुद्ध कदम हा वाद अधिकच चिघळण्याची चिन्हे आहेत.
