सोलापूर,दि.१४: राज्यात दुष्काळसदृश परिस्थितीमुळे अनेक शहरांमध्ये पाणीकपातीचे निर्णय घेतले जात असताना सोलापुरात मात्र महापौर विनायक कोंड्याल यांनी एक मोठा आणि दिलासादायक निर्णय घेतला आहे. शहरातील पाणीपुरवठ्याचे सध्याचेच वेळापत्रक कायम ठेवण्यात येणार असून, अतिरिक्त पाणीकपात लादली जाणार नाही, असे त्यांनी स्पष्ट केले आहे.
शहराच्या दैनंदिन पाणीपुरवठ्यात दररोज सुमारे ३३ दशलक्ष लिटर (एमएलडी) पाण्याची तूट असतानाही सोलापूरकरांचे हाल होऊ नयेत म्हणून हा निर्णय घेण्यात आला आहे.
पाणीपुरवठा आढावा बैठक
मंगळवारी महापालिकेतील महापौर दालनात पाणीपुरवठ्याचा सविस्तर आढावा घेण्यात आला. या बैठकीस उपमहापौर ज्ञानेश्वरी देवकर, सभागृह नेते नरेंद्र काळे, स्थायी समिती सभापती रंजिता चाकोते, महापालिका आयुक्त डॉ. सचिन ओम्बासे आणि प्रभारी सार्वजनिक आरोग्य अभियंता वेंकटेश चौबे यांच्यासह पाणीपुरवठा विभागातील प्रमुख अधिकारी उपस्थित होते. या बैठकीत उपलब्ध पाणी, वितरणाचे नियोजन आणि टंचाईबाबत सविस्तर चर्चा झाली.
पाण्याची मागणी आणि प्रत्यक्ष उपलब्धता
जलसुधार योजनेच्या आराखड्यानुसार सोलापूर शहराची सुमारे १२ लाख लोकसंख्या गृहीत धरून दररोज २४१ एमएलडी पाण्याची गरज निश्चित करण्यात आली आहे.
घरगुती वापर: १६२ एमएलडी
तरंगती लोकसंख्या: २.८२ एमएलडी
व्यावसायिक वापर: १६.९१ एमएलडी
औद्योगिक वापर: २७.५४ एमएलडी
(पाणीगळती आणि वितरणातील नुकसान गृहीत धरून ही एकूण गरज ठरवण्यात आली आहे.)
सध्या उजनी आणि हिप्परगा पाणीपुरवठा योजनांमधून शहराला दररोज सुमारे २०८ एमएलडी (एकूण गरजेच्या ८६ टक्के) पाणी उपलब्ध होत आहे. त्यामुळे रोज ३३ एमएलडीची तूट भासत असून वितरणाचे नियोजन करताना प्रशासनाला मोठी कसरत करावी लागत आहे.
वेळापत्रकात बदल नाही
सध्या सोलापुरातील काही भागांत तीन दिवसांनी, तर काही भागांत चार ते पाच दिवसांच्या अंतराने पाणीपुरवठा केला जातो. हा कालावधी आणखी वाढवल्यास नागरिकांच्या अडचणी वाढतील, ही बाब लक्षात घेऊन सध्याच्या वेळापत्रकात कोणताही बदल न करण्याचा मोठा निर्णय घेण्यात आला. शहराला अतिरिक्त पाणीकपातीला सामोरे जावे लागू नये, यासाठी महापालिका आयुक्तांच्या माध्यमातून जिल्हाधिकाऱ्यांना पत्र दिले जाणार आहे.
पाण्याचा अपव्यय रोखण्यासाठी स्वतंत्र पथक
पाणीटंचाईच्या पार्श्वभूमीवर पिण्याचे पाणी वाहने धुण्यासाठी, रस्ते स्वच्छ करण्यासाठी किंवा अंगणात टाकण्यासाठी वापरून त्याची नासाडी करू नये, असे आवाहन महापौरांनी केले आहे.
पाण्याचा अनावश्यक वापर करणाऱ्यांवर लक्ष ठेवण्यासाठी महापालिकेकडून स्वतंत्र पथक नियुक्त केले जाईल. पाण्याचा अपव्यय करणाऱ्यांना प्रथम नोटिसा बजावल्या जातील आणि गरजेनुसार कायदेशीर कारवाईसह गुन्हे दाखल केले जातील, असा इशारा महापौर विनायक कोंड्याल यांनी दिला. पाणीटंचाईच्या काळात नागरिकांनी प्रशासनाला सहकार्य करून उपलब्ध पाणी जपून वापरावे, असे आवाहनही त्यांनी केले.
