बीड,दि.3: रिक्षा आणि कारच्या भीषण अपघातात (Beed Accident) 6 ठार तर दोनजण गंभीर जखमी झाल्याची घटना घडली आहे. वडिलांच्या मृत्यूनंतर क्रियाकर्म आटोपून येत असताना अंबाजोगाईकडे येत असलेल्या रिक्षाला एका भरधाव वेगात येणाऱ्या कारने जोरदार धडक दिल्याने रिक्षातील तीन प्रवासी व रिक्षाचालकासह 6 जणांचा मृत्यू झाला आहे. तर दोन गंभीर प्रवासी जखमी झाले आहेत.
केज येथील धारूर रोड जवळील भवानी माळ वस्तीवर राहत असलेले नागरिक हे चरणसिंग गोके यांच्या अंत्यविधीनंतरच्या क्रियाकर्मचा कार्यक्रम आटोपून सायंकाळी 5 वाजेच्या दरम्यान अंबाजोगाईकडे रिक्षा क्र. (एम एच-23/ एक्स-5229) जात असताना चंदनसावरगाव ते होळच्या दरम्यान होळ शिवारातील गोसाव्याचे शेत नावाने ओळखल्या जात असलेल्या परिसरात अंबाजोगाई कडून येणाऱ्या एका भरधाव वेगतील इनोव्हा गाडीने क्र. (एम एच 16/सी एन-700) या गाडीने जोराची धडक दिली. हा अपघात एवढा भयानक होता की, रिक्षाचे अक्षरश: तुकडे तुकडे झाले.
दरम्यान, रिक्षातील मच्छिंद्रसिंग ग्यानसिंग गोके, प्रिया दीपकसिंग गोके, वीरसिंग दीपकसिंग गोके (रा. केज) आणि रिक्षाचालक बालाजी मुंडे (रा. पिसेगाव) हे चारजण जागीच ठार झाले तर या अपघातात मृत पावलेल्यांमध्ये दोन बालकांचाही समावेश आहे. हरजितसिंग बादलसिंग टाक, चंदाबाई बादलसिंग टाक, मालासिंग दुर्गासिंग (रा. जालना) दीपकसिंग मच्छिंद्रसिंग गोके, गोविंदसिंग मच्छिंद्रसिंग गोके (रा. भवानी नगर) केज हे पाचजण गंभीर जखमी झाले आहेत. जखमींवर अंबाजोगाई येथील स्वामी रामानंद तिर्थ ग्रामीण रुग्णालय व वैद्यकीय महाविद्यालय येथे उपचार सुरू आहेत.
मात्र यातील काही जणांना रुग्णालयात पोहचण्याच्या आधी प्राण सोडले होते. यात दोन लहान मुलांचाही समावेश असल्याने जास्त हळहळ व्यक्त करण्यात येत आहे.
