गांधीनगर,दि.३१ : गुजरातमधील काँग्रेसमधून बाहेर पडलेले युवा नेते हार्दिक पटेल (Hardik Patel) यांनी अखेर भाजपमध्ये प्रवेश करण्याचा निर्णय घेतला आहे. हार्दिक पटेल हे २ जून रोजी भाजपच्या दिग्गज नेत्यांच्या उपस्थित पक्षात प्रवेश करणार आहेत.
काही दिवसांपूर्वी हार्दिक पटेल (Hardik Patel) यांनी काँग्रेसमधून बाहेर पडण्याचा निर्णय घेतला. काँग्रेसला सोडताना हार्दिक पटेल यांनी पक्षनेतृत्वावर घणाघाती टीका केली होती. तसंच राम मंदिर, कलम ३७० या मुद्द्यांचं समर्थन केलं होतं. त्यामुळे पटेल हे लवकरच भाजपमध्ये प्रवेश करतील, अशी चर्चा राजकीय वर्तुळात सुरू होती. अखेर हार्दिक पटेल यांनी भाजपचं कमळ हाती घेण्याचा निर्णय घेतला आहे.
दरम्यान, या वर्षाच्या अखेरीस गुजरातमध्ये होणाऱ्या विधानसभा निवडणुकीपूर्वी हार्दिक पटेल यांनी भाजपमध्ये प्रवेश करण्याचा निर्णय घेतल्याने काँग्रेससमोरील अडचणींमध्ये वाढ झाली आहे. आगामी काळातही हार्दिक पटेल हे काँग्रेस नेतृत्वाला लक्ष्य करण्याची शक्यता आहे.
