सोलापूर,दि.१२: BJP MLA’s Son Video: भाजपा आमदाराच्या मुलाने वाहतूक पोलिसाशी गैरवर्तन केल्याचा प्रकार घडला आहे. उत्तर प्रदेशातील हाथरस जिल्ह्यात, एका वाहतूक पोलिसाने भाजपा आमदाराच्या मुलाला वाहतुकीला अडथळा होत असल्याने गाडी हलवण्यास सांगितले तेव्हा वाद झाला.
भाजपाचा झेंडा आणि आमदार लिहिलेल्या महिंद्रा स्कॉर्पिओ गाडीत बसलेल्या तरुणाने स्वतःला आमदाराचा मुलगा म्हणून ओळख करून दिली आणि वाहतूक पोलिसाला समोरून दूर जाण्यास सांगितले आणि येथून निघून जाण्यास सांगितले. या मुद्द्यावरून वाहतूक पोलिस आणि अलीगढ भाजपा आमदार ऋषिपाल सिंह यांचा मुलगा तपेश यांच्यात वाद झाला.
तपेश हे स्कॉर्पिओ गाडी घेऊन बाजारात गेले होते, जिथे त्यांचा वाहतूक पोलिसाशी वाद झाला. तपेशने त्यांची स्कॉर्पिओ रस्त्यावर उभी केली, ज्यामुळे ट्रॅफिकजॅम होत होतं. वाहतूक पोलिसाने गाडी काढण्यास सांगितलं तेव्हा नेत्याच्या मुलाने अरेरावी करायला सुरुवात केली.
मी तुमच्यापेक्षा दुप्पट शिक्षित… | BJP MLA’s Son Video
गाडीवर भाजपा आमदार लिहिलेले होते आणि बोनेटवर भाजपचा झेंडा लावला होता. गाडीत एक बंदूकधारीही होता. आमदाराच्या मुलाने गैरवर्तन केल्यानंतर, कॉन्स्टेबलनेही त्याच्याशी भांडण केले. व्हिडिओ बनवताना वाहतूक पोलिस कर्मचारी म्हणाले की, तुम्ही रस्ता अडवत आहात आणि त्याशिवाय तुम्ही गैरवर्तन करत आहात. तुम्ही वडिलांचे नाव बदनाम करत आहात. मी तुमच्यापेक्षा दुप्पट शिक्षित आहे. मला कसे बोलावे हे माहित आहे. तरुण आणि कॉन्स्टेबलमधील वादाशी संबंधित एक व्हिडिओ देखील समोर आला आहे.
वाहतूक पोलिसाशी गैरवर्तन केले
ही घटना सासनी कोतवाली परिसरातील एका चौकात घडली. सोमवारी दुपारी ३ वाजण्याच्या सुमारास, एक स्कॉर्पिओ कार (UP-81 B2324) महामार्गाच्या कडेला येऊन उभी राहिली. यामुळे चौकात जाम झाला तेव्हा ड्युटीवर असलेले वाहतूक पोलिस एसपी सिंह यांनी चालकाला गाडी हलविण्यास सांगितले. वाहतूक पोलिसाने अडवताच गाडीतील आमदाराचा मुलगा तपेश संतापला आणि पोलिसाला म्हणाला, ‘जा, येथून निघून जा’ आणि गाडी हलविण्यास नकार दिला.’
तपेश हे अलीगढ येथील भाजपा विधान परिषद आमदार (MLC) ऋषिपाल सिंह यांचा मुलगा आहे. या प्रकरणावर हाथरसचे एएसपी अशोक कुमार म्हणाले की, व्हायरल व्हिडिओची दखल घेण्यात आली आहे. या प्रकरणाची चौकशी केली जात आहे आणि पुढील कारवाई केली जाईल.
