पुणे,दि.25: राष्ट्रवादीचे अध्यक्ष शरद पवार (Sharad Pawar) यांनी पुण्यात प्रसारमाध्यमांशी संवाद साधला. यावेळी शरद पवारांनी विधानसभेचे विरोधी पक्षनेते देवेंद्र फडणवीस (Devendra Fadnavis) यांच्यावर टिका केली. सत्ता गेल्यानंतर लोक अस्वस्थ होतात. सगळेच माझ्यासारखे नसतात. निवडणुकांपूर्वीच काही लोकांनी ‘मी पुन्हा येणार, मी पुन्हा येणार’, अशा घोषणा दिल्या होत्या. त्यामुळेच ते सध्या अस्वस्थ होत असतील, तर मी त्यांना दोष देणार नाही, अशा शब्दांत राष्ट्रवादी काँग्रेसचे सर्वेसर्वा शरद पवार (Sharad Pawar) यांनी देवेंद्र फडणवीस (Devendra Fadnavis) यांना चिमटा काढला.
यावेळी शरद पवार यांना भाजप नेत्यांच्या महाराष्ट्रात राष्ट्रपती राजवट लागू करण्याच्या मागणीविषयी विचारणा करण्यात आली. त्यावेळी शरद पवार यांनी म्हटले की, सत्ता गेल्यानंतर लोक अस्वस्थ होतात. सगळेच माझ्यासारखे नसतात. माझी सत्ता कैकदा गेली आहे. 1980 साली माझे सरकार बरखास्त झाले. रात्री साडेबारा वाजता मुख्य सचिवांनी मला ही बातमी दिली. त्यानंतर मी तीन-चार लोकांना बोलावून घरातील सामान आवरले. दुसऱ्या दिवशी सकाळी सात वाजता दुसऱ्या ठिकाणी राहायला गेलो. सरकारची गादी सोडली. त्यादिवशी मुंबईत इंग्लंड आणि भारत यांची क्रिकेट मॅच होती. ती मॅच पाहण्यासाठी मी सकाळी 10 वाजता वानखेडे स्टेडिअमवर गेलो आणि दिवसभर मॅच पाहण्याचा आनंद लुटला. सत्ता येते आणि जाते. त्यामुळे आपण इतके अस्वस्थ होण्याची गरज नाही, असे शरद पवार यांनी म्हटले.
यावेळी शरद पवार यांनी विरोधी पक्षनेते देवेंद्र फडणवीस यांनाही चिमटा काढला. हल्ली सत्ता गेल्यामुळे लोक खूप अस्वस्थ होतात. मी त्यांना दोष देणार नाही. कारण निवडणुका होण्यापूर्वी ‘मी येणार, मी येणार’, अशा घोषणा त्यांनी दिल्या होत्या. पण तसे घडू शकले नाही. त्यामुळे ते अस्वस्थ असावेत. आपण अपेक्षा करूयात की, आमच्या स्नेह्यांना या सगळ्या परिस्थितीमधून काय निर्माण होते, हे लक्षात येईल आणि इथे योग्य वातावरण निर्माण करण्यास त्यांचे सहकार्य मिळेल, असे शरद पवार यांनी म्हटले.
