मुंबई,दि.२०: पवनराजे हत्याकांड खटल्याच्या निकालानंतर महाराष्ट्राच्या राजकारणात एक अभूतपूर्व पेच निर्माण झाला आहे. कोर्टाने सर्व आरोपींची निर्दोष मुक्तता केल्यामुळे खासदार ओमराजे निंबाळकर यांना कायदेशीर धक्का बसला असला, तरी त्यांच्या एका विधानाने आता संसदेतील ५ बंडखोर खासदारांचे टेन्शन कमालीचे वाढवले आहे. ठाकरे गटातून बाहेर पडून वेगळा गट स्थापन करण्याच्या तयारीत असलेल्या ‘ऑपरेशन टायगर’चा यामुळे फियास्को होण्याची शक्यता वर्तवली जात आहे.
काय आहे संपूर्ण वाद आणि संख्याबळाचा पेच?
राजकीय वर्तुळात गेल्या काही दिवसांपासून ठाकरे गटाचे ६ खासदार फुटून शिंदे गटात जाणार असल्याची जोरदार चर्चा होती. यामध्ये ओमराजे निंबाळकर आघाडीवर होते. मात्र, निकालानंतर ओमराजेंनी अचानक यू-टर्न घेत, “मी अद्याप कोणताही राजकीय निर्णय घेतलेला नाही, मतदारसंघातील जनतेशी चर्चा करून दोन दिवसांत निर्णय घेईन,” असे स्पष्ट केले. त्यांच्या या एका विधानामुळे संपूर्ण राजकीय समीकरणे उलट-पालट झाली आहेत.
दोन तृतीयांश (२/३) नियमाचा अडथळा: ठाकरे गटाकडे लोकसभेत एकूण ९ खासदार आहेत. पक्षांतर बंदी कायद्यानुसार, कारवाईपासून वाचण्यासाठी आणि स्वतंत्र गट स्थापन करण्यासाठी किमान ६ खासदारांची (२/३ बहुमत) आवश्यकता आहे.
पाच खासदार धोक्यात: जर ओमराजे निंबाळकर यांनी ठाकरेंसोबतच राहण्याचा निर्णय घेतला, तर बंडखोर खासदारांची संख्या फक्त ५ उरेल. ही संख्या कायदेशीर निकषांपेक्षा कमी असल्याने त्यांचा स्वतंत्र गट अस्तित्वात येऊ शकत नाही.
अपात्रतेची टांगती तलवार: अशा परिस्थितीत ठाकरे गटाने बजावलेला व्हीप (पक्षादेश) मोडल्यास, पक्ष या ५ खासदारांना अपात्र ठरवण्याची शिफारस लोकसभा अध्यक्षांकडे करू शकतो. ‘शरद यादव’ खटल्याच्या कायदेशीर दाखल्याचा वापर करून या पाचही जणांची खासदारकी रद्द केली जाऊ शकते.
बैठकीला गैरहजेरीचे गुढ काय?
पक्षाच्या अधिकृत बैठकीला उपस्थित न राहिल्याबद्दल विचारले असता, ओमराजेंनी कायदेशीर कारणांचे ढाल पुढे केले. “माझ्यासाठी कोर्टाचा निकाल महत्त्वाचा होता. १६ तारखेचा निकाल पुढे गेल्यामुळे मी कोणत्याही बैठकीला गेलो नाही,” असे सांगत त्यांनी आपल्या भूमिकेभोवतीचे गूढ आणखी वाढवले आहे.
आता ओमराजे निंबाळकर पुढील दोन दिवसांत काय भूमिका घेतात, यावर या ५ बंडखोर खासदारांचे भवितव्य आणि संसदेतील त्यांचे सदस्यत्व अवलंबून असणार आहे.
