नवी दिल्ली,दि.५: संसदेच्या अर्थसंकल्पीय अधिवेशनाचे कामकाज गोंधळामुळे विस्कळीत झाले आहे. एक दिवस आधी पंतप्रधान मोदी लोकसभेत बोलणार होते, परंतु त्यांचे भाषण रद्द करण्यात आले. आता सूत्रांनी असा दावा केला आहे की काँग्रेस पक्षाने संसदेत पंतप्रधान नरेंद्र मोदींवर हल्ला करण्याचा कट रचला होता. विरोधी गटाने हा हल्ला करण्यासाठी महिला खासदारांचा पुढे केले होते.
पंतप्रधान नरेंद्र मोदी यांच्या भाषणाशिवाय, आज (५ फेब्रुवारी) लोकसभेने राष्ट्रपतींच्या अभिभाषणावरील आभार प्रस्ताव आवाजी मतदानाने मंजूर केला. २००४ नंतर २२ वर्षांत पहिल्यांदाच असे घडले. दरम्यान, एएनआय या वृत्तसंस्थेने सूत्रांचा हवाला देत वृत्त दिले की, काँग्रेस पक्षाने पंतप्रधान मोदींवर शारीरिक हल्ला करण्याचा कट रचला होता, ज्यामुळे लोकसभेला संबोधित न करण्याचा निर्णय घेण्यात आला.
पंतप्रधान संसदेत उपस्थित होते
वृत्तसंस्था एएनआयने सूत्रांच्या हवाल्याने वृत्त दिले आहे की, राष्ट्रपतींच्या अभिभाषणावरील आभार प्रस्तावावर पंतप्रधान मोदींनी लोकसभेत भाषण दिले नाही. काँग्रेस लोकसभेत पंतप्रधान मोदींवर शारीरिक हल्ला करण्याचा कट रचत असल्याची विश्वसनीय माहिती होती आणि विरोधी पक्षाने त्यांच्या महिला खासदारांना पाठवले होते. त्यामुळे, पंतप्रधान मोदी उपस्थित होते आणि बोलण्यास तयार असतानाही सभापतींनी सभागृह तहकूब करण्याचा निर्णय घेतला.
त्याआधी, पंतप्रधान मोदींचे भाषण पुढे ढकलल्यानंतर, भाजप खासदार मनोज तिवारी यांनी आरोप केला की हा निषेध पूर्वनियोजित होता. त्यांनी असा दावा केला की महिला खासदार पंतप्रधानांच्या आसनाभोवती घेरावसारखी परिस्थिती निर्माण करत आहेत. ते म्हणाले की परिस्थिती चिंताजनक आहे आणि संसदीय कामकाज मंत्र्यांच्या तातडीने कारवाईमुळे परिस्थिती नियंत्रणात आली.
मनोज तिवारी यांनी पुढे सांगितले की, जेव्हा सभागृह संध्याकाळी ५ वाजता पुन्हा सुरू झाले आणि पंतप्रधानांचे उत्तर अपेक्षित होते, तेव्हा वर्षा गायकवाड आणि ज्योतिमणी यांच्यासह काही महिला विरोधी खासदार ट्रेझरी बाकांवर आल्या. त्यांनी “काय बरोबर आहे ते करा” असे लिहिलेले एक मोठे बॅनर हातात धरले होते. हे निषेध एका दिवसापूर्वी निलंबित केलेल्या आठ विरोधी खासदारांच्या समर्थनार्थ असल्याचे वृत्त आहे. महिला खासदारांनी पंतप्रधानांच्या आसनाभोवती उभे राहून निषेध केला. विरोधकांच्या सततच्याघोषणाबाजीदरम्यान, लोकसभा अध्यक्ष ओम बिर्ला यांनी गुरुवारी (५ फेब्रुवारी) आवाजी मतदान सुरू केले, त्यानंतर पंतप्रधान नरेंद्र मोदी यांनी कनिष्ठ सभागृहात भाषण न करताच हा प्रस्ताव मंजूर करण्यात आला.
