सोलापूर,दि.१३:राज्य परिवहन महामंडळाच्या पंढरपूर आगारातील कर्मचारी दशरथ गिड्डे यांनी आज (बुधवार) पहाटेच्या सुमारास घरात गळफास लावून आत्महत्या केली. दशरथ गिड्डे यांनी आर्थिक चणचणीला कंटाळून राहत्या घरी आत्महत्या केल्याने खळबळ उडाली आहे. या घटनेनंतर एसटी कर्मचाऱ्यांमधून तीव्र प्रतिक्रिया व्यक्त करण्यात येत असून राज्य शासनाला अजून अशा किती आत्महत्या पाहायच्या आहेत, असा संतप्त सवाल कर्मचाऱ्यांनी केला आहे.
पंढरपूर डेपो येथे सेवेत असलेले दशरथ गिड्डे हे मंगळवारी रात्री ड्युटी संपवून घरी गेले होते. आज पहाटे साडेपाच वाजता त्यांनी आपल्या पत्नीला मॉर्निंग वॉकला जाण्यास सांगितले. पत्नी बाहेर गेल्यानंतर दशरथ यांनी घरात गळफास घेऊन आत्महत्या केली. पत्नी फिरून परत आल्यावर दारे बंद दिसल्याने तिला शंका आली. तिने सर्वांना बोलावले व दार उघडले असता दशरथ हे गळफास घेतलेल्या अवस्थेत दिसून आले आणि सगळ्यांनाच धक्का बसला. दशरथ गिड्डे हे गेल्या काही दिवसांपासून आर्थिक विवंचनेत होते. कर्जामुळे त्यांच्या हातात केवळ सहा ते सात हजार रुपये पगार येत होता.
दशरथ यांनी खर्च परवडत नाही म्हणून आपल्या दहावीच्या मुलाला पाहुण्यांकडे शिकायला ठेवले होते तर सातवीत शिकणारी मुलगी त्यांच्यासोबत राहत होती. एसटी कर्मचाऱ्यांच्या वेतनात अनियमितता होत असून मिळणाऱ्या तुटपुंज्या पगारात घरातील खर्च भागवणे अवघड बनले होते. यातच घराचे दोन महिन्याचे भाडे देणे थकीत होते. अशावेळी कुठूनच पैशाची सोय न झाल्याने दशरथ हे तणावाखाली होते. त्यातूनच त्यांनी आत्महत्येचे टोकाचे पाऊल उचलले आहे, असे पत्नीने सांगितले.
दरम्यान, आर्थिक चणचणीमुळे गेल्या आठ महिन्यात एसटीच्या १५ कर्मचाऱ्यांनी आत्महत्या केल्याचा आरोप एसटी कर्मचाऱ्यांनी केला असून दशरथ गिड्डे यांच्या आत्महत्येनंतर कर्मचाऱ्यांमधून तीव्र संताप व्यक्त होत आहे.
