मुंबई,दि.२४: अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी जगाला एक मोठा आश्चर्याचा धक्का दिला आहे. अमेरिका आणि इराण दरम्यान एक व्यापक करार (US-Iran Deal) जवळपास पूर्ण होण्याच्या मार्गावर असल्याचा दावा ट्रम्प यांनी केला आहे. या ऐतिहासिक करारानंतर ‘होर्मुजची समुद्रधुनी’ (Strait of Hormuz) पुन्हा वाहतुकीसाठी खुली होईल, असा विश्वास त्यांनी व्यक्त केला. या नवीन घडामोडींमुळे आखाती देशांमधील युद्धाचे ढग विरण्याची चिन्हे आहेत.
इराण समृद्ध युरेनियमचा साठा सोपवण्यास तयार | US-Iran Deal
गेल्या अनेक वर्षांपासून इराणकडील समृद्ध युरेनियम (Enriched Uranium) हा दोन्ही देशांमधील वादाचा मुख्य कळीचा मुद्दा बनला होता. मात्र, या करारानुसार इराणने सपशेल माघार घेतल्याचे संकेत मिळत असून, ते आपल्याकडील समृद्ध युरेनियमचा साठा सोपवण्यास तयार झाले आहेत. इराणने घेतलेल्या या नरमाईच्या भूमिकेमुळे गेल्या अनेक दिवसांपासून सुरू असलेला अमेरिका-इराण संघर्ष आणि संभाव्य युद्ध (US Iran War) टळण्याची शक्यता निर्माण झाली आहे.
युरेनियमचे काय होणार? आंतरराष्ट्रीय नियमांनुसार प्रक्रिया
माध्यमांतील वृत्तानुसार, अमेरिकन अधिकाऱ्यांनी या कराराला दुजोरा दिला असून हा करार इराणच्या पूर्ण सहमतीनेच होत असल्याचे स्पष्ट केले आहे. आंतरराष्ट्रीय नियम आणि प्रक्रियेनुसार इराणने जतन करून ठेवलेले समृद्ध युरेनियम हस्तांतरित करण्यात येईल. हे युरेनियम एकतर अमेरिकेला दिले जाईल, किंवा रशियाकडे सुपूर्द केले जाईल अथवा त्याचे नागरी ऊर्जा निर्मितीसाठी रूपांतरण केले जाईल, अशी माहिती सूत्रांनी दिली आहे.
जागतिक इंधन पुरवठ्याला मिळणार मोठा दिलासा
अमेरिकेचे राष्ट्राध्यक्ष डोनाल्ड ट्रम्प यांनी शनिवारी पत्रकार परिषदेत ही महत्त्वाची घोषणा केली. ट्रम्प यांच्या मते, हा करार केवळ युद्ध रोखण्यासाठीच नाही, तर ‘होर्मुजची समुद्रधुनी’ (Strait of Hormuz) पुन्हा सुरू करण्यासाठी अत्यंत आवश्यक आहे.
गेल्या काही महिन्यांपासून होर्मुजची समुद्रधुनी हे जागतिक तणावाचे मुख्य केंद्र बनले होते. ही समुद्रधुनी बंद झाल्यामुळे आंतरराष्ट्रीय बाजारातील जागतिक इंधन पुरवठ्याला (Global Fuel Supply) मोठा अडथळा निर्माण झाला होता. आता हा मार्ग मोकळा झाल्यास जागतिक अर्थव्यवस्थेला आणि कच्च्या तेलाच्या पुरवठ्याला मोठा दिलासा मिळण्याची शक्यता आहे.
