नवी दिल्ली,दि.26: राजकारणामध्ये पुन्हा एकदा मोठी उलथापालथ होणार आहे. भाजपा पुन्हा सत्तेत येणार आहे. बिहारमध्ये भाजपा पुन्हा सत्तेत येणार असल्याचे वृत्त आहे. बिहारमध्ये गेल्या काही दिवसांपासून जेडीयू आणि आरजेडी यांच्यातील तणावपूर्ण संबंधांमध्ये आता एक मोठी बातमी समोर येत आहे. सूत्रांकडून मिळालेल्या माहितीनुसार, रविवारी नितीश कुमार नवीन सरकार बनवू शकतात. सूत्रांवर विश्वास ठेवला तर मुख्यमंत्री नितीश कुमार पक्ष बदलून पुन्हा भाजपाबरोबर युती करू शकतात. आणि त्यानंतरच ते नवीन सरकार स्थापन करण्याचा दावा करतील. मिळालेल्या माहितीनुसार, नितीश कुमार यांनी रविवारी त्यांचे सर्व नियोजित कार्यक्रम रद्द केले आहेत.
विधानसभा बरखास्त होणार नसल्याचे संकेत
पुढील वर्षी होणाऱ्या विधानसभा निवडणुकीपर्यंत नितीश कुमार मुख्यमंत्री राहतील अशी बातमी सूत्रांच्या हवाल्याने येत आहे. विधानसभा बरखास्त करून लोकसभेसोबत निवडणुका होऊ शकतात, अशी बातमी यापूर्वी आली होती. आता भाजपा आणि जेडीयू गेल्या वेळेप्रमाणे लोकसभा आणि विधानसभा निवडणुका एकत्र लढणार असल्याचे सूत्रांचे म्हणणे आहे. जागांची संख्या व इतर बाबी येत्या दोन-तीन दिवसांत स्पष्ट होतील. बिहारमध्ये स्थापन झालेल्या नव्या सरकारमध्ये मंत्रिपदांचे वितरण मागील भाजपा-जेडीयू सरकारप्रमाणेच राहण्याची शक्यता आहे.
प्रजासत्ताक दिनानिमित्त पाटणा येथे आयोजित कार्यक्रमात बिहार सरकारच्या अंतर्गत भांडणाची झलकही पाहायला मिळाली. या कार्यक्रमादरम्यान मुख्यमंत्री नितीश कुमार आणि उपमुख्यमंत्री तेजस्वी यादव एकमेकांपासून अंतर राखताना दिसले. कार्यक्रमाच्या समोर आलेल्या फोटोत दोन्ही नेते एकमेकांपासून दूर बसलेले दिसत होते. तर मुख्यमंत्री नितीश कुमार यांची एक खुर्ची रिक्त होती.
