दि.30: सुपरस्टार पुनीत राजकुमार यांचे हृदयविकाराच्या तीव्र झटक्याने निधन झाले. पुनीत राजकुमार यांच्या निधनाने चाहत्यांना धक्का बसला आहे. चाहत्यांमध्ये अप्पू या नावानं प्रसिद्ध असलेल्या पुनीतच्या निधनाचा धक्का त्याच्या चाहत्यांना इतका बसला की एकाने आत्महत्या केली, तर दोघांचा हृदयविकाराच्या झटक्याने मृत्यू झाला आहे. आणखी एकाने आत्महत्या करण्याचा प्रयत्न केला पण त्याचा जीव वाचवण्यात यश आलं.
सुपरस्टार पुनीत राजकुमार यांची कन्नड चित्रपटसृष्टीतील सर्वात प्रसिद्ध अभिनेत्यांपैकी एक अशी त्यांची ओळख होती. त्यांच्या निधनानंतर कन्नड सिनेसृष्टीसह बॉलिवूडमधील अनेक कलाकारांनी हळहळ व्यक्त केली आहे. बॉलिवूडमधील अनेक कलाकार, दिग्दर्शक, क्रिकेटपटू, राजकारणातील दिग्गजांनी त्यांच्या निधनानंतर शोक व्यक्त केला आहे. त्यात सोशल मीडियावर एक व्हिडीओ प्रचंड व्हायरल झाला आहे.
हा व्हिडीओ ट्वीटरवर प्रचंड व्हायरल झाला आहे. या व्हिडीओत पुनीतच्या निधनाची बातमी देत असताना, कन्नड न्यूज चॅनल BTV वृत्तनिवेदिकेला रडू कोसळले. त्यानंतर तिचे सहकारी तिचे सांत्वन करत असताना दिसत आहेत.
