सोलापूर,दि.29: Reliance AGM 2024: देशातील सर्वात मौल्यवान कंपनी रिलायन्स इंडस्ट्रीजची 47 वी वार्षिक सर्वसाधारण सभा (Reliance AGM) आज होणार आहे. या बैठकीत मुकेश अंबानी (Mukesh Ambani) अनेक मोठ्या घोषणा करू शकतात. यापैकी, कंपनीच्या 33.71 लाख किरकोळ गुंतवणूकदारांच्या नजरा रिलायन्स ग्रुपच्या रिलायन्स जिओ आणि रिलायन्स रिटेल या दोन कंपन्यांच्या आयपीओच्या (IPO) घोषणेवर खिळल्या आहेत. रिलायन्सचे अध्यक्ष दोन्ही कंपन्यांच्या समस्यांबाबत चित्र स्पष्ट करू शकतात. याशिवाय इतरही अनेक महत्त्वाचे मुद्दे आहेत ज्यांची माहिती एजीएममध्ये दिली जाऊ शकते.
2019 मध्ये IPO आणण्याचे संकेत | Reliance AGM 2024
मुकेश अंबानी यांच्या नेतृत्वाखालील रिलायन्स इंडस्ट्रीज लिमिटेडची वार्षिक सर्वसाधारण सभा (Reliance AGM 2024) आज दुपारी 2 पासून सुरू होईल. यामध्ये रिलायन्सचे चेअरमन त्यांच्या दोन कंपन्यांच्या रिलायन्स जिओ किंवा रिलायन्स रिटेलच्या आयपीओची घोषणा करू शकतात, ज्यासाठी गुंतवणूकदार बर्याच काळापासून वाट पाहत आहेत. खरं तर, 2019 च्या वार्षिक सर्वसाधारण सभेत मुकेश अंबानी यांनी संकेत दिले होते की या दोन कंपन्यांची शेअर बाजारात सूची पाच वर्षांत होऊ शकते. अशा स्थितीत आज याबाबतचे चित्र स्पष्ट होईल, अशी आशा आहे.
रिलायन्सच्या 47 व्या एजीएममध्ये, दोन्ही कंपन्यांच्या आयपीओसह, रिलायन्सच्या ऑइल-टू-केमिकल (O2C) मधील संभाव्य धोरणात्मक हिस्सेदारीच्या विक्रीसंदर्भातील महत्त्वाच्या मुद्द्यांवर घोषणा केली जाऊ शकते. याशिवाय नवीन ऊर्जा क्षेत्रातील प्रकल्पांशी संबंधित अपडेट्स शेअर केले जाण्याची शक्यता आहे. IPO नंतर, Reliance Jio च्या 5G सेवेबाबत सर्वात महत्वाची घोषणा केली जाऊ शकते. अहवालानुसार, कंपनी 5G नेटवर्कच्या विस्ताराबाबत तपशील देखील शेअर करू शकते. सध्या जगभरातील मोठ्या टेक कंपन्या AI मध्ये गुंतवणूक करत आहेत, तर रिलायन्स देखील AI संदर्भात घोषणा करू शकते.
याशिवाय गेल्या वर्षी मुकेश अंबानी यांनी त्यांच्या तीन मुलांमध्ये व्यवसायाची विभागणी केली होती आणि ईशा अंबानी आणि आकाश अंबानी यांच्यासह अनंत अंबानी यांना रिलायन्स बोर्डमध्ये (Reliacne Board) नॉन-एक्झिक्युटिव्ह डायरेक्टरची भूमिका देण्यात आली होती. या एजीएममध्ये त्यांच्या जबाबदाऱ्यांमध्ये कोणतेही बदल किंवा अतिरिक्त भूमिका दिल्या जाण्यावरही गुंतवणूकदार लक्ष असणार आहे.
