नवी दिल्ली,दि.25: आम आदमी पक्षाचे अनेक आमदार नॉट रिचेबल आहेत. दिल्लीचे उपमुख्यमंत्री मनीष सिसोदिया (Manish Sisodia) यांनी भाजपावर (BJP) गंभीर आरोप केले होते. मनीष सिसोदिया (Manish Sisodia) यांनी भाजपच्या एका नेत्याने पक्ष फोडण्यासाठी मोठी ऑफर दिल्याचा आरोप केला होता. आप पक्षाच्या सूत्रांचे म्हणणे आहे की मनीष सिसोदिया यांच्याकडे आम आदमी पक्षात फूट पाडण्याच्या बदल्यात भाजपने दिलेल्या ऑफरचे कॉल रेकॉर्डिंग आहे.
महाराष्ट्र, बिहारनंतर आता दिल्लीत अवघ्या देशाचं लक्ष लागलं आहे. कारण दिल्लीतील राजकीय पेचप्रसंगाच्या काळात आम आदमी पक्षाचे अनेक आमदार संपर्कात नसल्याची बाब समोर येत आहे. पक्षाच्या सूत्रांनी दिलेल्या माहितीनुसार, पक्षाच्या अनेक आमदारांशी संपर्क होऊ शकलेला नाही. आज सकाळी 11 वाजता दिल्लीचे मुख्यमंत्री अरविंद केजरीवाल यांच्या घरी विधिमंडळ पक्षाची बैठक होणार आहे. यापूर्वी आम आदमी पक्षाच्या 4 आमदारांनी भाजपवर 20 कोटी रुपयांची ऑफर दिल्याचा आणि धमकावल्याचा आरोप केला होता.
बुधवारी सायंकाळी आम आदमी पक्षाने सर्व आमदारांची बैठक बोलावण्याचा निर्णय घेतला आहे. या बैठकीत किती आमदार पोहोचतात याकडे सर्वांचे लक्ष असणार आहे. दिल्लीत आम आदमी पक्षाचे 62 आमदार आहेत.
एक दिवस आधी म्हणजे 24 ऑगस्टला आम आदमी पार्टीने भाजपवर मोठा आरोप केला होता. भाजप दिल्लीतील केजरीवाल सरकार पाडण्याचा कट रचत असल्याचा दावा ‘आप’ने केला होता. यासाठी भाजपने आम आदमी पक्षाच्या चार आमदारांना 20-25 कोटी रुपयांची ऑफर दिली आहे.
आम आदमी पक्षाचे राज्यसभा खासदार संजय सिंह यांनी पत्रकार परिषदेत भाजपवर गंभीर आरोप केले. नरेंद्र मोदी सरकारच्या ‘साम दाम दंड भेड’चा मी पर्दाफाश करेन, असं संजय सिंह म्हणाले होते. पंतप्रधान कसे दिल्ली सरकार पाडण्याचा प्रयत्न करत आहेत. भाजपचे लोक आमच्या आमदारांना भेटायला येतात. मनीष सिसोदियांसारखे खोटे गुन्हे दाखल करतील, अशी धमकी देतात, असे संजय सिंह म्हणाले होते. आता आमदार फोडण्यासाठी 20 आणि 25 कोटींचे आमिष दिले जात आहे.
