नवी दिल्ली,दि.5: देशाची राजधानी नवी दिल्लीत कोरोना विषाणूच्या ओमिक्रॉन (Omicron) या नवीन प्रकाराचे पहिले प्रकरण समोर आले आहे. परदेशातून परतलेल्या आणि LNJP रुग्णालयात दाखल झालेल्या एका कोरोना रुग्णामध्ये याची पुष्टी झाली आहे. परदेशातून परतलेल्या 12 लोकांना एलएनजेपी रुग्णालयात दाखल करण्यात आले आणि त्यांचे नमुने जीनोम सिक्वेन्सिंगसाठी पाठवण्यात आले. त्यापैकी एकजण ओमिक्रॉनने संक्रमित झाल्याची पुष्टी केली आहे. बाधित तरुण टांझानियाहून आले होता.
यासह, देशभरात ओमिक्रॉनची (Omicron) एकूण पाच प्रकरणे समोर आली आहेत. शनिवारी ओमिक्रॉनची दोन प्रकरणे नोंदवली गेली, गुजरातमधील जामनगरमध्ये 72 वर्षीय व्यक्ती ओमिक्रॉन संक्रमित आढळली. त्याचवेळी दक्षिण आफ्रिकेतून (South Africa) संध्याकाळी मुंबईत परतलेल्या एका व्यक्तीला संसर्ग झाल्याचे आढळून आले. दक्षिण आफ्रिकेतून ही व्यक्ती दुबईमार्गे दिल्लीत आली आणि तिथून मुंबईत पोहोचली. 25 नोव्हेंबर रोजी त्याला कोरोना विषाणूची (Corona Virus) लागण झाल्याचे आढळून आले आणि आता त्यात ओमिक्रॉन प्रकार आढळून आला आहे. सध्या त्या व्यक्तीला कल्याण डोंबिवली कोविड केअर सेंटरमध्ये ठेवण्यात आले आहे.
त्याच वेळी, गेल्या आठवड्यात दोन प्रकरणे नोंदवली गेली. यामध्ये 46 वर्षीय डॉक्टर आणि दक्षिण आफ्रिकेच्या नागरिकाचा समावेश आहे. बाधित डॉक्टरांनी कोरोना लसीचे दोन्ही डोस घेतले होते. याशिवाय त्यांनी अलीकडे कोणताही प्रवास केला नव्हता. त्याचवेळी, दक्षिण आफ्रिकेचा नागरिक भारतात आला तेव्हा त्याचा कोरोना रिपोर्ट निगेटिव्ह आला होता, मात्र नंतर तो कोरोना पॉझिटिव्ह आढळला. त्याचा नमुना जीनोम सिक्वेन्सिंगसाठी पाठवला असता त्यात ओमिक्रॉनची पुष्टी झाली.
