मनमाड,दि.२५: शिवसेनेचे नेते खासदार संजय राऊत (Sanjay Raut) हे नांदगावमध्ये रविवारी (दि. २४) गुप्ता लॉन्स येथे शिवसेना कार्यकर्ता मेळाव्याचे आयोजन करण्यात आले होते, तेंव्हा उपस्थित होते. ‘तुम्ही आमचा पाहुणचार चांगला केला. एकदा छगन भुजबळांनाही (Chhagan Bhujbal) पाहुणचारासाठी बोलवा’, असा मिश्किल सल्ला खासदार संजय राऊत यांनी आमदार सुहास कांदे यांना दिला. ‘भुजबळांना आम्ही सांगू, आता नांदगावचा नाद सोडा. इकडे फार लक्ष घालू नका. आज नाशिकला लाल दिवा आला, उद्या नांदगावला आणू’ असा टोलाही त्यांनी नांदगाव येथील कार्यक्रमात लगावला.
आमदार कांदे व पालकमंत्री भुजबळ यांच्या कथित वादाच्या पार्श्वभूमीवर नांदगावमध्ये प्रथमच आलेले खासदार राऊत आणि आमदार कांदे जाहीररित्या याबाबत काय बोलतील, अशी उत्सुकता होती. कांदे यांनी आपल्या भाषणात भुजबळ यांच्यावर पुन्हा टीका केली. त्यानंतर राऊत यांनीही भाषणातून कधी मिश्किल तर कधी खोचकपणे भुजबळ यांच्यावर ‘वाग्बाण’ सोडले. ‘मी शिवसेनेत असतो तर मुख्यमंत्री झालो असतो’ या भुजबळ यांच्या विधानाचा समाचार घेताना राऊत यांनी ‘शिवसेनेत होतात या पुण्याईवर आज तुम्ही टिकून आहात’ असे भुजबळ यांना सुनावले. आम्ही सरकार स्थापन केले नसते तर तुम्ही पालकमंत्री कसे झाले असते, अन्याय करायला? असा सवालही त्यांनी केला.
मात्र कांदे तुमच्याकडे जिल्हा नियोजन समितीचे पद कधीतरी येईल. निधीही तुमच्या ताब्यात येईल. तेव्हा तुम्ही कोणावर अन्याय करू नका, असा सल्लाही राऊत यांनी कांदे यांना दिला. तुम्ही अन्यायाविरुद्ध लढलात. बाळासाहेब आज असते तर तुमची पाठ थोपटली असती, असे प्रशस्तीपत्रही राऊत यांनी कांदेंना दिले. मात्र, भुजबळ महाविकास आघाडीचे आमचे ज्येष्ठ नेते आहेत. आदरणीय आहेत, हे सांगायलाही राऊत विसरले नाहीत. कांदे यांनी भुजबळांना पुन्हा लक्ष्य करीत त्यांच्या मुलाला निवडणुकीत पाडले म्हणून नांदगावला अपुरा निधी देण्यात आल्याचा आरोप केला. येवल्याला ८० कोटी व चांदवडमध्ये भाजप असतानाही ४० कोटी दिले. सर्वात जास्त पाऊस, महापूर येऊनही नांदगावला फक्त दोन कोटी मिळाले. हा अन्याय असल्याचे कांदे म्हणाले. आम्हाला निधी मिळाला नाही तर आख्खी ‘डीपीडीसी’ उचलून आणू, असा इशाराही त्यांनी दिला. राऊत यांच्या हस्ते मनमाड व नांदगाव येथे ऑक्सिजन प्लान्टचा शुभारंभ तसेच विविध विकासकामांचे उद्घाटन झाले.
मेळाव्यात ज्येष्ठ नेते बापूसाहेब कवडे, गटनेते गणेश धात्रक, मयूर बोरसे, डॉ. संजय सांगळे, विलास आहेर, राजेंद्र भाबड आदींची भाषणे झाली. शिवसेना पदाधिकारी भाऊसाहेब चौधरी, सुनील बागूल, विजय करंजकर, नगराध्यक्ष राजेश कवडे, राजेंद्र आहिरे, मधुकर हिरे, बाळासाहेब क्षीरसागर आदी उपस्थित होते.
मनमाडचा पाणीप्रश्न सोडविण्यासाठी स्वतः प्रयत्न करण्याची ग्वाही राऊत यांनी दिली. मनमाडचा पाणीप्रश्न महाराष्ट्राच्या प्रतिष्ठेचा प्रश्न असून, हे सरकार मनमाड व नांदगावला पाणी दिल्याशिवाय राहणार नाही, असे राऊत म्हणाले. नांदगावमध्ये पूर येऊन गेलेला असताना वीज कंपनी शेतकऱ्यांची वीज तोडत असेल तर सरकारमध्ये असलो तरीही शिवसेनेतर्फे तीव्र आंदोलन करू, असेही त्यांनी सुनावले. आता वीज कंपनीच्या वायरमनला गावात घुसू देणार नाही, असा इशारा कांदे यांनी दिला.
