नवी दिल्ली,दि.5: PM Narendra Modi: पंतप्रधान नरेंद्र मोदी (PM Narendra Modi) यांच्या सुरक्षेत आज मोठी चूक झाली आहे. पंजाबमधील फिरोजपूरमध्ये त्यांची मोठी सभा होणार होती. मात्र आंदोलक शेतकऱ्यांनी त्यांचा ताफा रस्त्यावरच अडवला. आता एएनआयशी बोलताना अधिकाऱ्यांनी सांगितले की, या घटनेमुळे पीएम नरेंद्र मोदी खूप संतापले आहेत. सीएम चन्नी यांच्यावर निशाणा साधत ते म्हणाले, “मी विमानतळावर जिवंत परत येऊ शकलो याबद्दल तुमच्या मुख्यमंत्र्यांचे आभार.”
पीएम मोदी भटिंडा विमानतळावर परतत असताना त्यांनी अधिकाऱ्यांना हा संदेश दिला होता, असे सांगण्यात येत आहे. त्यांनी सीएम चन्नी यांच्यावर निशाणा साधला होता. “मी जिवंत विमानतळावर परत येऊ शकलो याबद्दल तुमच्या मुख्यमंत्र्यांचे आभार”, असे ते म्हणाले होते. आज पीएम मोदी पंजाबमध्ये भाजपच्या निवडणूक प्रचाराला सुरुवात करणार होते. फिरोजपूरमध्ये सकाळपासूनच गर्दी जमायला सुरुवात झाली होती. पण काही आंदोलकांमुळे पंतप्रधान मोदींची रॅली रद्द करावी लागेल याची कुणालाही कल्पना नव्हती. आता गृह मंत्रालयानेही पंतप्रधानांच्या सुरक्षेतील ही मोठी त्रुटी असल्याचे मानले असून पंजाब सरकारकडून सविस्तर अहवाल मागवला आहे.
वास्तविक, पीएम मोदी भटिंडा येथे पोहोचले होते. येथून त्यांना हेलिकॉप्टरने हुसैनीवाला येथील राष्ट्रीय शहीद स्मारकावर जायचे होते. पण खराब प्रकाश आणि पावसामुळे पीएम मोदी 20 मिनिटे थांबले. पण हवामानात सुधारणा होत नसल्याने त्यांनी रस्त्याने राष्ट्रीय हुतात्मा स्मारकाकडे जाण्याचा निर्णय घेतला. या मार्गाने 2 तास लागणार होते. पंजाब डीजीपीकडून सुरक्षा व्यवस्थेची पुष्टी केल्यानंतर पंतप्रधान मोदी रस्त्याने निघाले.
पंतप्रधान मोदींचा ताफा राष्ट्रीय हुतात्मा स्मारकापूर्वी सुमारे 30 किमी अंतरावर असलेल्या उड्डाणपुलावर पोहोचला तेव्हा काही आंदोलकांनी इथला रस्ता अडवला. त्यामुळे पंतप्रधान मोदींच्या ताफ्याला उड्डाणपुलावर 15 ते 20 मिनिटे थांबावे लागले. पंतप्रधानांच्या सुरक्षेतील ही मोठी चूक मानली जात आहे.
