दि.१४: Hijab Row: हिजाब (Hijab) वरून राजकारण तापले आहे. कर्नाटकात (Karnatka Hijab Row) हिजाब घालून शाळेत प्रवेश देण्यास नकार दिल्याने वाद निर्माण झाला. हा वाद देशातील अनेक राज्यात सुरु झाला. यावरून राजकारणही सुरू आहे. कर्नाटकातला हिजाब वाद चांगलाच पेटल्याचं चित्र आहे. सामाजिक, राजकीय, सांस्कृतिक अशा सर्वच क्षेत्रांमधून या वादावर प्रतिक्रिया उमटत आहे. स्वतःला चांगली मुस्लीमधर्मीय सिद्ध करण्यासाठी हिजाब घालण्याची गरज नाही, अशी प्रतिक्रिया श्रीनगरमधल्या बारावी बोर्डात पहिल्या आलेल्या विद्यार्थिनीने दिली आहे.
श्रीनगरमधील रहिवासी आरोसा परवेझ (Arosa Parvez), हिने विज्ञान शाखेत बारावीच्या बोर्ड परीक्षेत अव्वल स्थान पटकावले होते, तिला ‘हिजाब’ न घातल्यामुळे ऑनलाइन ट्रोल करण्यात आले. ट्रोल्सला उत्तर देताना, ती म्हणाली की ती इस्लामिक तत्त्वांचे पालन करते आणि स्वत: ला एक चांगली मुस्लीम सिद्ध करण्यासाठी हिजाब घालण्याची गरज नाही.
इंडिया टुडेशी बोलताना आरोसा परवेझ म्हणाली, “माझा अल्लाहवर विश्वास आहे आणि इस्लामिक तत्त्वांचे पालन करते. स्वत:ला चांगली मुस्लीम असल्याचे सिद्ध करण्यासाठी मला हिजाब घालण्याची गरज नाही.आरोसा परवेझने सांगितले की, ती ऑनलाइन ट्रोलिंगमुळे खूप नाराज आहे. “मला याचा त्रास होत नाही पण सोशल मीडियावरील या कमेंट्सनंतर माझे पालक खूप चिंतेत आहेत,” ती म्हणाली.
नुकत्याच जाहीर झालेल्या बारावीच्या बोर्ड परीक्षेच्या निकालात विज्ञान शाखेत प्रथम क्रमांक पटकावल्याबद्दल आरोसा परवेझ हिचा शुक्रवारी जिल्हा प्रशासनातर्फे सत्कार करण्यात आला. जम्मू आणि काश्मीरमधील श्रीनगरच्या इलाहीबाग भागातील रहिवासी असलेल्या आरोसा परवेझने विज्ञान शाखेत ५०० पैकी ४९९ (९९.८०टक्के) गुण मिळवले आहेत. श्रीनगरचे उपायुक्त मोहम्मद एजाज असद यांनी त्यांच्या कार्यालयात आयोजित एका सत्कार समारंभात तिचा सत्कार केला. परवेझला तिच्या यशाबद्दल प्रोत्साहन म्हणून उत्कृष्टतेचे प्रमाणपत्र, ट्रॉफी आणि १०,००० रुपयांचा धनादेश देऊन गौरविण्यात आले.
मात्र, शनिवारी सकाळी आरोसा परवेझ हिच्या विरोधात सोशल मीडियावर ट्रोलिंग सुरू करण्यात आलं. एकीकडे काही सोशल मीडिया यूजर्स तिचे अभिनंदन करत होते, तर दुसरीकडे काही लोक तिच्यावर हिजाब न घातल्याबद्दल टीका करत होते. काही युजर्सनी तिची तुलना कर्नाटकातील शाळकरी मुलीशी केली, जिने ‘अल्लाह-हू अकबर’ चा नारा दिला आणि तिला “काश्मीरमधील मुलींसाठी आदर्श” बनण्यासाठी तिच्याकडून काही धडे घेण्यास सांगितले.
