अहमदाबाद,दि.१: आयपीएल २०२६ च्या महामुकाबल्यात (IPL 2026 Final) रविवारी रात्री रॉयल चॅलेंजर्स बेंगळुरूने (Royal Challengers Bengaluru) गुजरात टायटन्सचा ५ गडी राखून पराभव केला आणि ट्रॉफीवर नाव कोरले. या पराभवाच्या धक्क्यातून गुजरातचा संघ सावरत नव्हता, तोच मैदानाबाहेर एका अत्यंत थरारक घटनेने सर्वांच्याच काळजाचा ठोका चुकवला. अहमदाबादच्या नरेंद्र मोदी स्टेडियमवरून (Narendra Modi Stadium) हॉटेलकडे परतत असताना गुजरात टायटन्सच्या टीम बसला अचानक आग लागल्याची धक्कादायक माहिती समोर आली आहे. कर्णधार शुभमन गिलसह (Shubman Gill) सर्व खेळाडू या मोठ्या दुर्घटनेतून थोडक्यात बचावले आहेत.
चालकाचं प्रसंगावधान अन् १ तास रस्त्यावरच मुक्काम
मिळालेल्या माहितीनुसार, सामना संपवून जेव्हा संपूर्ण संघ बसने हॉटेलकडे निघाला होता, तेव्हा वाटेतच बसमध्ये शॉर्ट सर्किट (Short Circuit) झाले आणि इंजिनमधून वेगाने धूर निघू लागला. प्रसंगाचे गांभीर्य ओळखून चालकाने तातडीने बस रस्त्याच्या कडेला घेतली. सुरक्षा रक्षक आणि टीम मॅनेजमेंटने (Team Management) कमालीची तत्परता दाखवत शुभमन गिल आणि इतर खेळाडूंना सुखरूप खाली उतरवले. सुदैवाने या अपघातात कोणालाही दुखापत झाली नाही. मात्र, या अचानक उद्भवलेल्या गोंधळामुळे गुजरातचे खेळाडू तब्बल एक तास रस्त्यावरच अडकून पडले होते. अखेर दुसऱ्या वाहनाची व्यवस्था करून त्यांना सुरक्षित हॉटेलमध्ये पोहोचवण्यात आले.
प्रवासाचा थकवा की आरसीबीची कमाल? पराभवानंतर विक्रम सोलंकींचे रोकठोक उत्तर
मैदानातील पराभव आणि त्यानंतर बस अपघाताचा हा थरार यामुळे गुजरातच्या खेळाडूंचा मानसिक आणि शारीरिक थकवा (Mental and Physical Exhaustion) प्रचंड वाढला होता. दरम्यान, सलग सामने आणि प्रवासाच्या थकव्यामुळे गुजरात फायनल हरली का, असा प्रश्न उपस्थित केला जात होता. यावर गुजरात टायटन्सचे डायरेक्टर ऑफ क्रिकेट (Director of Cricket) विक्रम सोलंकी यांनी प्रेस कॉन्फरन्समध्ये (Press Conference) अत्यंत चोख आणि परिपक्व उत्तर दिले.
विक्रम सोलंकी म्हणाले कि, आम्ही कमी दिवसांत जास्त सामने खेळलो आणि आमची टीम थकली होती, असं बोलून मी आरसीबीच्या शानदार विजयाचं श्रेय कमी करणार नाही. आमचा संघ पराभवासाठी अशी कोणतीही कारणं देत नाही. हे खरं आहे की या खेळपट्टीवर १५५ धावा खूप कमी होत्या, पण आमच्या गोलंदाजांनी हा लहान स्कोअर वाचवण्यासाठीही मैदानात जीवाची बाजी लावली. आमचं कुठे चुकलं याचं आम्ही आत्मपरीक्षण (Self-introspection) नक्कीच करू, पण समोरच्या संघाने आमच्यापेक्षा सरस खेळ केला हे आम्हाला मान्य करावंच लागेल.
एकीकडे सलग सामने खेळल्याचा थकवा आणि दुसरीकडे विजेतेपद हातातून निसटल्याचे दुःख, अशा दुहेरी संकटात सापडलेल्या गुजरात टायटन्ससाठी रविवारची ती रात्र खरोखरच एका वाईट स्वप्नासारखी ठरली.
