मुंबई,दि.१: राष्ट्रवादीचे नेते मंत्री नवाब मलिक यांनी देवेंद्र फडणवीस हेच राज्यातील ड्रग्जच्या खेळाचे मास्टरमाइंड असल्याचा दावा केला आहे. नवाब मलिक यांनी आज सकाळीच पत्रकार परिषद घेत खळबळजनक दावा केला आहे. देवेंद्र फडणवीस यांच्यावर निशाणा साधत नवाब मलिकांनी जोरदार टीका केली आहे. देवेंद्र फडणवीस यांच्या इशाऱ्यावरुन ड्रग्जचा खेळ सुरू आहे, असा आरोप नवाब मलिक यांनी केला आहे. तसंच, जयदीप राणांचा फडणवीसांसोबत संबंध काय?, असाही सवाल केला आहे.
‘जयदीप राणा यांचा फोटो मी ट्विटरवर शेअर केला आहे. एका मराठी वेब पोर्टलनं दिलेल्या बातमीत त्यात वर्मा नावाच्या व्यक्तीने ही माहिती दिली आहे. मी फोटो ट्वीट केलेला व्यक्ती जयदीप राणा आहे. तो सध्या साबरमती जेलमध्ये आहे. राणाचे माजी मुख्यमंत्री देवेंद्र फडणवीस यांच्यासोबत संबंध आहेत. जेव्हा देवेंद्र फडणवीस मुख्यमंत्री होते. तेव्हा त्यांच्या पत्नीने अमृता यांनी एक गाणं गायलं होतं. नदी संरक्षण अभियानासाठी ‘रिव्हर साँग’ बनललं होतं. त्यात सोनु निगम व अमृता यांनी गाणं गायलं होतं. तर, त्यात देवेंद्र फडणवीस अभिनय केला होता. या गाण्याला जयदीप राणा यांनी अर्थसहाय्य पुरवलं होतं. राणा हे ड्रग्ज पेडलर आहेत. देवेंद्र फडणवीस व जयदीप राणा यांचे घनिष्ठ संबंध आहेत. गणपती दर्शनाच्या वेळी देवेंद्र फडणवीस व जयदीप राणा एकत्र आहेत. तसे फोटोही आहेत. हे प्रकरण राज्यातील ड्रग्ज व्यवसायासंबंधित आहे,’ असा गौप्यस्फोट नवाब मलिक यांनी केला आहे.
‘जयदीप राणा यांच्यासोबत फडणवीसांचा काय संबंध आहे? याची चौकशी व्हायला पाहिजे. फडणवीसांच्या आशीर्वादाने महाराष्ट्रात ड्रग्जचे धंजे चालतात. जयदीप राणा हे फडणवीसांच्या घरच्या कार्यक्रमात उपस्थित राहतात. राज्यातील ड्रग्ज रॅकेटला फडणवीस संरक्षण देतात, असा मोठा आरोप नवाब मलिकांनी केला आहे. तसंच, ड्रग्ज प्रकरणाचे मास्टरमाइंड देवेंद्र फडणवीस असल्याचा आम्हाला संशय आहे,’ असंही नवाब मलिक यांनी म्हटलं आहे.
