मुंबई,दि.२८: मुख्य निवडणूक आयुक्त ज्ञानेश कुमार यांच्याविरोधात २ ऑक्टोबर (गांधी जयंती) रोजी दादर येथील ऐतिहासिक शिवाजी पार्क मैदानात देशव्यापी आंदोलनाचा नारळ फोडण्याच्या तयारीत असलेल्या ‘कॉक्रोच जनता पार्टी’ला (CJP) मुंबई पोलिसांनी मोठा धक्का दिला आहे. सुरक्षेचे, ध्वनीप्रदूषणाचे आणि वाहतूक कोंडीचे कारण पुढे करत पोलिसांनी या आंदोलनाला परवानगी नाकारली आहे. मात्र, पोलिसांच्या या निर्णयामुळे सीजेपीचे संस्थापक अभिजित दीपके कमालीचे आक्रमक झाले असून, त्यांनी २ ऑक्टोबर रोजी मुंबईत थेट ‘जेल भरो आंदोलन’ छेडण्याचा सज्जड इशारा दिला आहे.
नेमका वाद काय?
केंद्रीय निवडणूक आयोगाच्या निवडणूक याद्यांच्या विशेष पुनरीक्षण (SIR) प्रक्रियेतील अनियमितता आणि अंतर्गत मतभेदांच्या अहवालानंतर सीजेपीने आक्रमक पवित्रा घेतला होता. मुख्य निवडणूक आयुक्तांनी राजीनामा द्यावा, या मागणीसाठी पक्षाचे राष्ट्रीय संघटक अजिंक्य शिंदे यांनी २ ऑक्टोबर रोजी दुपारी ३ ते रात्री ९ या वेळेत शिवाजी पार्कवर निदर्शने करण्यासाठी पोलिसांकडे परवानगी मागितली होती.
पोलिसांनी परवानगी का नाकारली?
शिवाजी पार्क पोलीस ठाण्याने सीजेपीचे नेते अजिंक्य शिंदे यांना पत्र पाठवून परवानगी नाकारल्याची माहिती दिली. पोलिसांनी आपल्या स्पष्टीकरणात पुढील मुख्य कारणे नमूद केली आहेत:
१. उच्च न्यायालयाचे आदेश: मुंबई उच्च न्यायालयाच्या २०१३ मधील आदेशानुसार शिवाजी पार्क मैदानावर बिगर-क्रिकेट किंवा राजकीय/सामाजिक सभांना परवानगी देण्याचे अधिकार पोलिसांना नाहीत.
२. महापालिकेची परवानगी नाही: आंदोलनकर्त्यांनी पालिका प्रशासनाकडून (BMC) मैदाना वापराबाबत आवश्यक असणारे ना-हरकत प्रमाणपत्र सादर केलेले नाही.
३. शांतता आणि वाहतूक कोंडी: शिवाजी पार्क परिसर हा रहिवासी आणि ‘सायलन्स झोन’ आहे. येथे आंदोलन झाल्यास ध्वनीप्रदूषण होईल आणि जवळील रुग्णालयांत जाणाऱ्या रुग्णवाहिकांना व वाहतुकीला मोठा अडथळा निर्माण होईल.
पोलिसांनी सीजेपीला शिवाजी पार्कऐवजी मुंबईतील इतर पर्यायी ठिकाणी परवानगीसाठी अर्ज करण्याचा सल्ला दिला आहे.
अभिजित दीपके यांचा सवाल आणि ‘जेल भरो’चा इशारा
पोलिसांच्या या निर्णयावर सीजेपीचे प्रमुख अभिजित दीपके यांनी सोशल मीडिया प्लॅटफॉर्म ‘X’ वरून तीव्र संताप व्यक्त केला. “नागरिकांचा लोकशाही मार्गाने आवाज दाबण्याचे हे प्रशासकीय प्रयत्न खपवून घेतले जाणार नाहीत. जर आम्हाला शांततेने आंदोलन करण्याचा घटनात्मक अधिकार नाकारला जात असेल, तर सीजेपी गांधी जयंतीच्या दिवशी संपूर्ण मुंबईत ‘जेल भरो आंदोलन’ करेल,” असे दीपके यांनी ठणकावून सांगितले.
तसेच पक्षपातीपणाचा आरोप करताना दीपके यांनी सवाल केला की, “नियम आणि न्यायालयाच्या आदेशांचे कारण देऊन आम्हाला परवानगी नाकारली जाते, मग उपमुख्यमंत्री एकनाथ शिंदे किंवा इतर सत्ताधाऱ्यांच्या कार्यक्रमांना शिवाजी पार्कवर परवानगी कशी मिळते?”
गांधी जयंतीच्या दिवशीच पोलीस प्रशासन आणि सीजेपी आंदोलक आमनेसामने येण्याची चिन्हे दिसत असून, दादरसह संपूर्ण मुंबईत २ ऑक्टोबरला राजकीय आणि सामाजिक वातावरण कमालीचे तापण्याची शक्यता आहे.
