मुंबई,दि.२८: मुख्यमंत्री माझी लाडकी बहीण योजनेचा (Chief Minister Majhi Ladki Bahin Yojana) बेकायदेशीरपणे लाभ घेणाऱ्या महिलांवर आता सरकार कडक कारवाई करण्याच्या तयारीत आहे. सरकारने आवाहन करूनही नाव मागे न घेतलेल्या आणि नंतर छाननीत अपात्र ठरलेल्या महिलांची आता सखोल चौकशी (Inquiry) केली जाणार आहे. संबंधित महिलांनी कधीपासून योजनेचा लाभ घेतला आणि अर्ज करताना चुकीची माहिती का दिली, याचा शोध घेतला जाईल. नंदुरबार (Nandurbar) जिल्ह्यात या चौकशीला सुरुवात झाली असून, प्रशासनाने कारवाईचे थेट संकेत दिले आहेत.
नंदुरबार जिल्ह्यात ११ हजारांहून अधिक महिला अपात्र
नंदुरबार जिल्ह्यात ‘मुख्यमंत्री माझी लाडकी बहीण योजनेला’ महिलांचा मोठा प्रतिसाद मिळाला होता. जिल्ह्यात एकूण ४ लाख ३४ हजार ४०० महिलांनी अर्ज केले होते. त्यापैकी ४ लाख २२ हजार ७५८ महिला पात्र ठरल्या असून, छाननीदरम्यान तब्बल ११ हजार ७२२ महिला अपात्र (Ineligible) ठरल्या आहेत.
या अपात्र ठरलेल्या महिलांची आता प्रशासनाकडून सखोल पडताळणी (Verification) केली जात आहे. “लाभार्थी महिला खऱ्या आहेत की नाही, याची तपासणी सध्या सुरू आहे,” अशी माहिती महिला व बालविकास अधिकारी (Women and Child Development Officer) संजय पाटील यांनी दिली आहे. तपासणीत कोणतीही अनियमितता (Irregularity) आढळल्यास संबंधितांवर कायदेशीर कारवाई केली जाईल, असे संकेत जिल्हा प्रशासनाने दिले आहेत.
‘ई-केवायसी’ न केल्याने चौकशीचा ससेमिरा
या योजनेसाठी ई-केवायसी (e-KYC) पूर्ण करण्यासाठी डिसेंबर २०२५ पर्यंत मुदत देण्यात आली होती. तसेच, ज्या महिलांना तांत्रिक अडचणी येत होत्या, त्यांना ३० एप्रिलपर्यंत केवायसी पूर्ण करणे बंधनकारक होते. ही प्रक्रिया वेळेत पूर्ण न करणाऱ्या आणि निकषात न बसणाऱ्या अपात्र लाभार्थ्यांची आता चौकशी केली जात आहे.
केवायसी करूनही अनेक महिला लाभापासून वंचित!
दुसरीकडे, नंदुरबार जिल्ह्यात प्रामाणिकपणे प्रक्रिया पूर्ण करूनही अनेक महिला अद्याप या योजनेच्या लाभापासून वंचित असल्याचं चित्र आहे. जानेवारी महिन्यापासून खात्यात पैसे जमा न झाल्याने संतप्त महिलांनी गेल्या आठवड्यात थेट जिल्हाधिकारी कार्यालयातील महिला आणि बालविकास अधिकाऱ्यांचे कार्यालय गाठून प्रशासनाला जाब विचारला.
बँकेत केवायसी प्रक्रिया पूर्ण केल्याचा दावा महिला करत आहेत. मात्र, तांत्रिक अडचणी (Technical Issues) आणि अपूर्ण माहितीमुळे अनेक लाभार्थ्यांची केवायसी रखडल्याचे समोर आले आहे. कडक उन्हाची पर्वा न करता महिलांनी कार्यालयाबाहेर गर्दी केली होती. “आमची केवायसी प्रक्रिया लवकरात लवकर पूर्ण करून प्रलंबित भत्ता (Pending Benefit) मिळावा,” अशी मागणी या वंचित महिलांनी केली आहे.
“पैसे येत नसतील तर सर्वांचेच बंद करा”; नांदेडमध्ये महिलांचे ठिय्या आंदोलन
नांदेड (Nanded) जिल्ह्यातील लाडक्या बहिणींची अवस्थाही वेगळी नाही. गेल्या ५ ते ६ महिन्यांपासून योजनेचे पैसे न मिळाल्याने हतबल झालेल्या महिलांनी दोन दिवसांपूर्वी थेट महिला आणि बालविकास कार्यालयावर धडक देत ‘ठिय्या आंदोलन’ (Protest) केले.
“गेल्या अनेक महिन्यांपासून प्रशासनाकडून केवायसी प्रक्रिया बंद ठेवण्यात आली आहे,” असा आरोप आंदोलक महिलांनी केला. केवायसी प्रक्रिया तात्काळ सुरू करून प्रलंबित रक्कम खात्यात जमा करावी, अशी मागणी त्यांनी केली. “काही महिलांना नियमित पैसे मिळतात आणि काही महिलांना मिळत नाही, हा दुजाभाव चुकीचा आहे. प्रशासनाने सर्वांसाठी समान निर्णय घ्यावा, नाहीतर सर्वच महिलांचे पैसे बंद करावेत,” असा संतप्त इशाराही आंदोलक महिलांनी प्रशासनाला दिला आहे.
