सोलापूर,दि.२७: भारतीय जनता पक्षाने पक्षविरोधी कारवायांमध्ये सहभागी असल्याबद्दल दोन आमदारांची हकालपट्टी केली आहे. पक्षविरोधी कारवायांमध्ये सहभागी असल्याबद्दल भाजपने आमदार एसटी सोमशेखर (S. T. Somashekhar) आणि शिवराम हेब्बर (Arabail Shivaram Hebbar) यांना सहा वर्षांसाठी पक्षातून काढून टाकले आहे.
काय आहे प्रकरण?
राज्यसभा निवडणुकीदरम्यान एसटी सोमशेखर यांच्यावर क्रॉस व्होटिंगचा आरोप आहे आणि शिवराम हेब्बर यांच्यावर राज्यसभा निवडणुकीतील मतदानादरम्यान गैरहजर राहण्याचा आरोप आहे. याबाबत कर्नाटकातील भाजपच्या मुख्य प्रतोदांनी दोन्ही आमदारांना नोटीस बजावून उत्तर मागितले होते.
भाजपने दोन आमदारांची केली हकालपट्टी
कर्नाटकातील राज्यसभेच्या चार जागांसाठी गेल्या फेब्रुवारीमध्ये मतदान झाले. या चार जागांपैकी काँग्रेसने तीन आणि भाजपने एक जागा जिंकली. व्हीप जारी असूनही, एसटी सोमशेखर यांनी काँग्रेस उमेदवार अजय माकन यांच्या बाजूने मतदान केले, ज्यामुळे भाजपला फक्त एकच जागा जिंकता आली. असा दावा केला जात आहे की सोमशेखर आणि हेब्बर हे पक्ष नेतृत्वावर कथितपणे नाराज होते. एसटी सोमशेखर हे कर्नाटकातील यशवंतपूर मतदारसंघाचे भाजप आमदार आहेत. तर शिवराम हेबर हे येल्लापूर मतदारसंघाचे भाजप आमदार आहेत. तथापि, दोघांनीही त्यांच्या जबाबात पक्षविरोधी कारवायांमध्ये सहभाग असल्याचे नाकारले होते.
