मुंबई,दि.१: व्यवसायिक एलपीजी सिलिंडरच्या दरात मोठी घट करण्यात आली आहे. सिलिंडरच्या दरात मोठी वाढ झाल्याने हॉटेल, रेस्टॉरंटमधील जेवण महाग झाले होते. महागाईचा सामना करत असलेल्या सर्वसामान्यांसाठी महत्त्वाची बातमी आहे. सरकारी तेल कंपन्यांनी व्यवसायिक एलपीजी सिलिंडरच्या दरात कपात केली आहे. त्यामुळे हॉटेल, रेस्टॉरंटमधील जेवण स्वस्त होण्याची शक्यता आहे. सिलिंडरचे नवे दर आजपासून लागू झाले आहेत.
इंडियन ऑईलनं १९ किलोच्या व्यवसायिक गॅस सिलिंडरच्या दरात १०० रुपयांपर्यंत कमी केली आहे. त्यामुळे मुंबईत एलपीजी सिलिंडर १ हजार ८४४ रुपयांना मिळेल. मुंबईत सिलिंडरच्या दरात ९२.५० रुपयांनी कपात करण्यात आली आहे. घरगुती वापराच्या गॅस सिलिंडरच्या दरात कोणतीही कपात करण्यात आलेली नाही. गेल्या महिन्यात घरगुती वापराचा सिलिंडर ५० रुपयांनी महागला होता. आता मात्र १४.२ किलोच्या सिलिंडरचे दर जैसे थेच ठेवण्यात आले आहेत.
दिल्लीत व्यवसायिक वापराच्या सिलिंडरच्या दरात ९१.५० रुपयांची कपात झाली आहे. त्यामुळे आता दिल्लीत सिलिंडर १ हजार ९७६ रुपयांऐवजी १ हजार ८८५ रुपयांना मिळेल. कोलकात्यात सिलिंडर १०० रुपयांनी स्वस्त झाला आहे. कोलकात्यात गेल्या महिन्यात सिलिंडरचा दर २ हजार ९५ रुपये होता. तो आजपासून १ हजार ९९५ रुपये असेल.
