मुंबई,दि.५: पाच राज्यांची विधानसभा निवडणूक होत आहे. मोठा सर्वे समोर आला आहे. देशात २०२४ साली लोकसभेच्या निवडणुका पार पडणार आहेत. त्याआधी पाच राज्यांच्या निवडणुका होत आहेत. छत्तीसगड, राजस्थान, मध्य प्रदेश, तेलंगणा आणि मिझोरम या राज्यांमध्ये होत असलेल्या निवडणुकीच्या माध्यमातून लोकसभेचा अंदाज येणार आहे. अशातच छत्तीसगड, राजस्थान, मध्य प्रदेश, मिझोरम आणि तेलंगणाच्या विधानसभा निवडणुकीत कुणाचं सरकार येणार? कुणाचा पराभव होणार? याचा मोठा सर्वे समोर आला आहे.
‘एबीपी न्यूज सी-वोटर’ने सर्वेच्या माध्यमातून ६३ हजार लोकांचं मत जाणून घेतलं आहे. मध्य प्रदेश, छत्तीसगडमध्ये काँग्रेस आघाडीवर आहे. तर, काँग्रेसची सत्ता असलेलं राजस्थान भाजपाकडे जाताना दिसत आहे. तेलंगणात आणि मिझोरममध्ये प्रादेशिक पक्षाचेच सरकार येणार असल्याची शक्यता वर्तवली आहे.
छत्तीसगडमध्ये विधानसभेच्या ९० जागांवर सत्ताधारी काँग्रेस आणि भाजपात थेट लढत होणार आहे. सर्वेनुसार काँग्रेसला ४५ टक्के तर भाजपाला ४३ टक्के मते मिळण्याची शक्यता आहे. त्यामुळे छत्तीसगडमध्ये पुन्हा एकदा काँग्रसचे सरकार येऊ शकते. काँग्रेसला बहुमतासह ४५ ते ५१ जागांवर आघाडी मिळताना दिसत आहे. तर, दुसऱ्या क्रमाकांवर असलेल्या भाजपाला ३६ ते ४२ जागा मिळू शकतात.
सर्वेनुसार राजस्थानमध्ये काँग्रेसला मोठा धक्का बसू शकतो. २०० जागा असलेल्या राजस्थानमध्ये भाजपाला ४५ टक्के तर काँग्रेसला ४२ टक्के मत मिळण्याची शक्यता आहे. भाजपाचे ११४ ते १२४ उमेदवार निवडून येऊ शकतात. तसेच, काँग्रेसला ६७ ते ७७ जागांवर समाधान मानावे लागू शकते. राजस्थानमध्ये भाजपाला स्पष्ट बहुमत मिळताना दिसत आहे.
मध्य प्रदेशात सत्ताधारी भाजपा आणि काँग्रेसमध्ये अटीतटीची लढाई दिसत आहे. २३० जागा असलेल्या मध्य प्रदेशात काँग्रेसला ४५ टक्के, तर भाजपाला ४२ टक्के मतदान होण्याची शक्यता वर्तवली जात आहे. काँग्रेसचे ११८ ते १३० उमेदवार निवडून येऊ शकतात. त्याचप्रमाणे भाजपाला ९९ ते १११ जागांवर विजय मिळू शकतो.
तेलंगणात ११९ जागांवर भारत राष्ट्र समिती ( बीआरएस ) आणि काँग्रेसमध्ये लढत होणार आहे. सर्वेनुसार बीआरएसला ४१ टक्के तर काँग्रेसला ३९ टक्के मते मिळू शकतात. तर, बीआरएसला ४९ ते ६१ आणि काँग्रेसला ४३ ते ५५ जागा मिळण्याची शक्यता आहे.
मिझोरममध्ये ४० जागांसाठी निवडणूक पार पडणार आहे. यामध्ये मिझोरम नॅशनल फ्रंटला १७ ते २१, काँग्रेसला ६ ते १० आणि झेडपीएम आघाडीचा १० ते १४ जागांवर विजय होऊ शकतो.
