दि.30: सुपरस्टार पुनीत राजकुमार यांचे हृदयविकाराच्या तीव्र झटक्याने निधन झाले. पुनीत राजकुमार यांच्या निधनाने चाहत्यांना धक्का बसला आहे. चाहत्यांमध्ये अप्पू या नावानं प्रसिद्ध असलेल्या पुनीतच्या निधनाचा धक्का त्याच्या चाहत्यांना इतका बसला की एकाने आत्महत्या केली, तर दोघांचा हृदयविकाराच्या झटक्याने मृत्यू झाला आहे. आणखी एकाने आत्महत्या करण्याचा प्रयत्न केला पण त्याचा जीव वाचवण्यात यश आलं.
सुपरस्टार पुनीत राजकुमार अवघे 46 वर्षांचे होते. ते ज्येष्ठ अभिनेते राजकुमार (Rajkumar) यांचे पुत्र होते. पुनीत यांनी आपल्या करिअरची सुरुवात बालकलाकार म्हणून केली होती. 1985 मध्ये ते ‘बेट्टाडा होवू’ चित्रपटात दिसले होते. या भूमिकेसाठी त्यांना अनेक पुरस्कार मिळाले. त्यांना राष्ट्रीय पुरस्कारही मिळाला होता. याच वर्षी प्रदर्शित झालेल्या ‘सुवरत्थान’ या चित्रपटात ते अखेरचे दिसले होते. या चित्रपटासाठी त्यांची खूप प्रशंसा झाली होती. पुनीत राजकुमार चाहत्यांमध्ये प्रचंड लोकप्रिय होते. अप्पू (Appu) म्हणून ते प्रसिद्ध होते. लाखो लोक त्यांचे चाहते होते. त्यांच्या अकस्मात निधनानं चाहत्यांना प्रचंड धक्का बसला. सगळीकडे एकच शोककळा पसरली.
बेळगावी जिल्ह्यातील (Belgavi) अथणी इथं राहुल गाडीवड्डारा यांनी काल रात्री गळफास घेऊन आत्महत्या (Suicide) केली. आपल्या आवडत्या अभिनेत्याच्या निधनाच्या बातमीने धक्का बसलेल्या राहुल यांनी पुनीतचा फोटो फुलांनी सजवला आणि नंतर गळफास घेतला.उडुपी जिल्ह्यातील साळीग्राम गावातील सतीश नामक एका 35 वर्षांच्या ऑटोरिक्षा चालकाने पुनीतच्या मृत्यूची बातमी कळताच दुःखावेगाने आपला हात रिक्षावर जोरात आपटला. त्याला मोठी जखम होऊन प्रचंड रक्तस्त्राव सुरू झाला. पुनीतला आपण अशी आदरांजली वाहत असल्याचं त्यानं सांगितलं.बेळगावी जिल्ह्यातील शिंदोली गावात परशुराम देमन्ननावर हे पुनीतचे कट्टर चाहते होते. त्याच्या मृत्यूची बातमी टीव्हीवर बघत असताना ते सतत रडत होते. रात्री 11 वाजता त्यांना हृदयविकाराच्या तीव्र झटका आला आणि त्यातच त्यांचे निधन झाले.
कर्नाटकातील (Karanataka) चामराजनगर जिल्ह्यातील हनुर तालुक्यातील मरूर गावातल्या मुनिअप्पा या 30 वर्षांच्या तरुणाला टीव्हीवर ही बातमी पाहत असताना हृदयविकाराचा तीव्र झटका आला आणि त्याचा जागीच मृत्यू झाला. ही बातमी ऐकताच त्याच्या छातीत वेदना होऊ लागल्या आणि काही क्षणातच तो कोसळला. त्याला जागीच मृत घोषित करण्यात आलं. मुनिअप्पा 7 वर्षांपासून बेंगळुरूमध्ये किरकोळ नोकऱ्या करत होता; पण लॉकडाउनमुळे तो 2 वर्षांपूर्वी त्याच्या मूळ गावी परतला होता. त्यानं पुनीत राजकुमार एकही चित्रपट चुकवला नव्हता. मुनियप्पाच्या मागे पत्नी आणि दोन लहान मुलं आहेत.
