छत्रपती संभाजीनगर,दि.९: छत्रपती संभाजीनगरमधील बहुचर्चित निदा खान प्रकरणाला (Nida Khan Case) आता एक नवीन आणि राजकीय वळण मिळाले आहे. एमआयएमच्या (MIM) नगरसेवकाला सहआरोपी केल्यानंतर, आता शिंदे गटाचे नेते आणि राज्याचे सामाजिक न्याय मंत्री संजय शिरसाट (Sanjay Shirsat) यांनी थेट माजी खासदार इम्तियाज जलील (Imtiaz Jaleel) यांच्यावर धक्कादायक आरोप केले आहेत. या संपूर्ण प्रकरणाची विशेष तपास पथकामार्फत (SIT Inquiry) चौकशी करण्याची मागणी शिरसाट यांनी मुख्यमंत्री देवेंद्र फडणवीस यांच्याकडे केली आहे.
इम्तियाज जलील यांनी निदा खानची नाशिकमध्ये घेतली भेट?
पत्रकार परिषदेत बोलताना संजय शिरसाट यांनी दावा केला की, इम्तियाज जलील हे निदा खानला नाशिकमध्ये जाऊन भेटले होते. “निदा खान मुंब्र्याला न जाता नाशिक आणि अहमदनगरमध्ये का राहिली? तिला तिथे कोणी पाठवले? याचा खुलासा होणे आवश्यक आहे. जलील यांनीच नगरसेवकावर दबाव आणून तिला राहण्यासाठी घर उपलब्ध करून दिले,” असा खळबळजनक आरोप शिरसाट यांनी केला आहे.
‘लव्ह जिहाद’ आणि धर्मांतराचे जाळे (Modus Operandi)
या प्रकरणातील गांभीर्य अधोरेखित करताना शिरसाट म्हणाले की, ही एक सुनियोजित यंत्रणा आहे जी तीन स्तरांवर काम करते:
1. धर्मांतर (Conversion)
2. लव्ह जिहाद (Love Jihad)
3. अमली पदार्थांचे सेवन (Drug Addiction/Intoxication)
हे प्रकरण म्हणजे केवळ एखादी गुन्हेगारी घटना नसून, ‘द काश्मीर फाईल्स’ (The Kashmir Files) प्रमाणेच एक गंभीर कट असल्याचे त्यांनी नमूद केले.
अहमदनगरमधील वास्तव्यावर प्रश्नचिन्ह
निदा खानचा अहमदनगरशी कोणताही संबंध नसताना ती तिथे दीड महिना कशी राहिली, असा सवाल शिरसाट यांनी उपस्थित केला. “ज्या घरात ती राहत होती, ते घर एमआयएमच्या एका नगरसेवकाचे आहे. तिथे कोणाचीही ये-जा नसायची. आरोपीला फरार करणे आणि त्यानंतर पुरावे मागणे हे जाणीवपूर्वक केले जात आहे,” असेही ते म्हणाले.
