बेंगळुरू,दि.२३: संसदेत ऑनलाइन गेमिंग विधेयक मंजूर झाल्यानंतर अवघ्या एका दिवसातच, अंमलबजावणी संचालनालयाने (ईडी) कर्नाटक काँग्रेस नेते के.सी. वीरेंद्र यांच्या घरातून १२ कोटी रुपये रोख जप्त केले आहेत. रोख रकमेव्यतिरिक्त, ईडीने ६ कोटी रुपयांचे दागिने देखील जप्त केले आहेत.
ईडीने चितदुर्गा जिल्ह्यातील काँग्रेस आमदार के.सी. वीरेंद्र आणि इतरांविरुद्ध ऑनलाइन आणि ऑफलाइन बेटिंग प्रकरणी गुन्हा दाखल केला होता.
अनेक राज्यांमध्ये छापे
ईडीने गंगटोक, चित्तौडगड जिल्हा, बेंगळुरू, हुबळी, जोधपूर, मुंबई आणि गोवा यासह देशभरातील ३१ ठिकाणी छापे टाकले आणि गोव्यात पाच कॅसिनोवरही छापे टाकले – पप्पीज कॅसिनो गोल्ड, ओशन रिव्हर्स कॅसिनो, पप्पीज कॅसिनो प्राइड, ओशन ७ कॅसिनो आणि बिग डॅडी कॅसिनो.
कंपन्या दुबईतून होत होत्या अॅापरेट
तपासात असे दिसून आले आहे की आरोपी किंग ५६७, राजा ५६७ इत्यादी नावांच्या अनेक ऑनलाइन बेटिंग साइट्स चालवत होता. याशिवाय, आरोपीचा भाऊ के.सी. थिप्पास्वामी दुबईहून तीन कंपन्या चालवतो, डायमंड सॉफ्टेक, टीआरएस टेक्नॉलॉजीज आणि प्राइम ९ टेक्नॉलॉजीज. या कंपन्या कॉल सेंटर सेवा आणि गेमिंग व्यवसायाशी संबंधित आहेत. त्याच वेळी, दुसरा भाऊ के.सी. नागराज आणि त्याचा मुलगा पृथ्वी एन. राज देखील या कामात सहभागी असल्याचे सांगितले जात आहे.
रोख रक्कम, दागिने, चांदी, आलिशान गाड्या
छाप्यादरम्यान, ईडीला सुमारे १२ कोटी रुपये रोख सापडले, ज्यामध्ये १ कोटी रुपये परकीय चलन, सुमारे ६ कोटी रुपयांचे सोने, १० किलो चांदी आणि चार आलिशान कारचा समावेश आहे. याशिवाय, १७ बँक खाती आणि २ लॉकर देखील गोठवण्यात आले आहेत. ईडीला छाप्यादरम्यान अनेक महत्त्वाचे कागदपत्रे आणि पुरावे देखील सापडले आहेत, ज्यामुळे हे स्पष्ट झाले की वेगवेगळ्या थरांद्वारे बेकायदेशीर उत्पन्न पांढरे दाखवण्याचा प्रयत्न केला जात आहे.
