लखनऊ,दि.2: पाकिस्तानचे संस्थापक मोहम्मद अली जिना (Mohammad Ali Jinnah) हे भारताच्या स्वातंत्र्याच्या प्रतिकांमध्ये गणले जातात या विधानामुळे समाजवादी पक्षाचे नेते आणि यूपीचे माजी मुख्यमंत्री अखिलेश यादव (Akhilesh Yadav) हे टीकाकारांच्या निशाण्यावर आहेत. AIMIM नेते असदुद्दीन ओवेसी (Asaduddin Owaisi) यांनी याप्रकरणी अखिलेश यांच्यावर हल्लाबोल करताना त्यांना इतिहास वाचण्याचा सल्ला दिला आहे.
हैदराबादचे खासदार ओवेसी यांनीही अखिलेश यादव यांच्या या वक्तव्यावर जोरदार टीका केली. एआयएमआयएम नेते म्हणाले, ‘अखिलेश यादव यांना असे वाटत असेल की अशी विधाने करून ते लोकांच्या एका वर्गाला खुश करू शकतात, तर मला वाटते की ते चुकीचे आहेत. त्यांनी त्यांचे सल्लागार बदलावे. त्यांनीही स्वतःला शिक्षित करून थोडा इतिहास वाचायला हवा.’
सपा प्रमुखांच्या या वक्तव्यावर भाजपनेही त्यांच्यावर टीका केली आहे. सपा प्रमुख अखिलेश यादव यांनी रविवारी हरदोईच्या रॅलीत म्हटले होते, “सरदार वल्लभभाई पटेल, महात्मा गांधी, जवाहरलाल नेहरू आणि (मोहम्मद अली) जिना यांनी याच संस्थेत शिक्षण घेतले आणि बॅरिस्टर झाले आणि त्यांनी स्वातंत्र्य मिळवून दिले. स्वातंत्र्यासाठी त्यांना कोणत्याही प्रकारे संघर्ष करावा लागला तर ते मागे हटले नाहीत. विशेष म्हणजे, लोकसंख्येच्या बाबतीत, उत्तर प्रदेश, देशातील सर्वात मोठे राज्य आहे. पुढील वर्षी विधानसभा निवडणुका (UP Assembly Poll 2022 ) होणार आहेत.
भाजपने निवडणुकीपूर्वी अखिलेश यांच्यावर ‘मुस्लिम तुष्टीकरण’ केल्याचा आरोप केला आहे. वृत्तसंस्था एएनआयने उत्तर प्रदेशचे मुख्यमंत्री योगी आदित्यनाथ यांच्या हवाल्याने म्हटले आहे की, “समाजवादी पक्षाच्या प्रमुखांनी रविवारी जिना यांची तुलना सरदार वल्लभभाई पटेल यांच्याशी केली. हे लाजीरवाणे आहे. फाळणीवर विश्वास ठेवणारी तालिबानी मानसिकता आहे. सरदार पटेलांनी देश एकत्र केला. सध्या पंतप्रधान नरेंद्र मोदी यांच्या नेतृत्वाखाली ‘एक भारत, श्रेष्ठ भारत’ साध्य करण्याचे काम सुरू आहे.
भाजपच्या अन्य नेत्यांनीही अखिलेश यादव यांच्यावर निशाणा साधला आहे. भाजपचे प्रदेशाध्यक्ष स्वतंत्र देव सिंह यांनी रविवारी ट्विट केले की, सरदार पटेल यांच्या जयंतीनिमित्त अखिलेश यादव मोहम्मद अली जिना यांची प्रशंसा का करत आहेत? आणखी एका ट्विटमध्ये लिहिले आहे की, ‘जिनांवरील इतके प्रेम पाहून असे वाटते की तुम्ही भारत-पाकिस्तान सामन्यानंतर एक दोन फटाके तुम्हीही उडवले असतील.’
या वक्तव्यावर बहुजन समाज पक्षाच्या सुप्रीमो मायावती यांनीही अखिलेश यांच्यावर सडकून टीका केली. 2019 च्या लोकसभा निवडणुकीत समाजवादी पक्षासोबत युती करणाऱ्या बसपच्या नेत्याने सांगितले की, अखिलेशची टिप्पणी आणि भाजपचे ‘उत्तर’ हे यूपी निवडणुकीपूर्वी मतांचे ध्रुवीकरण करण्याच्या दोन्ही पक्षांच्या रणनीतीचा भाग आहेत.
मायावती म्हणाल्या, “सपा आणि भाजपचे राजकारण एकमेकांना पोषक आणि पूरक राहिले आहे. या दोन पक्षांची विचारसरणी जातीयवादी असल्याने त्यांचे अस्तित्व एकमेकांवर आधारलेले आहे. म्हणूनच जेव्हा सपा सत्तेत असते तेव्हा भाजप मजबूत असतो तर बसपा सत्तेत असताना भाजप कमकुवत असतो.
