उल्हासनगर,दि.15: भाजपा शिवसेना वाद | वृत्तपत्रातील जाहिरातीवरून शिवसेना (शिंदे गट) आणि भाजपमध्ये वाद निर्माण झाला आहे. भाजपमधील वाद आता विकोपाला पोहोचला आहे. भाजपने शिंदे गटातील मतदारसंघात हस्तक्षेप सुरू केल्याने शिंदे गटात खळबळ उडाली होती. त्यानंतर श्रीकांत शिंदे यांनी खासदारकीचा राजीनामा देण्याची भाषा केली. त्यानंतरही भाजपने कल्याण-डोंबिवली आणि ठाणे लोकसभा मतदारसंघ आमचाच असल्याचं सांगत भाजपच्या जखमेवर मीठ चोळले. त्यानंतर उल्हासनगरात भाजपच आणि शिंदे गटाची बॅनरबाजी पाहायला मिळाली. शिंदे गटाने बॅनर्स लावून भाजपला डिवचलेलं असतानाच आता भाजपने बॅनर्स लावून शिंदे गटाला डिवचले आहे. त्यामुळे दोन्ही पक्षातील वाद प्रचंड विकोपाला गेल्याचं दिसून येत आहे.
हा आमच्या भाजपचा मोठेपणा! देवेंद्र फडणवीस… | भाजपा शिवसेना वाद
उल्हासनगरात पुन्हा एकदा शिवसेना, भाजपमध्ये बॅनरवॉर पाहायला मिळत आहे. भाजपने बॅनर लावत शिवसेना शिंदे गटाला थेट डिवचलं आहे. 50 कुठं आणि 105 कुठं? हा आमच्या भाजपचा मोठेपणा! देवेंद्र फडणवीस साहेब नाम ही काफी है!, असा मजकूर असलेले बॅनर्स उल्हासनगरात लावण्यात आले आहेत. या बॅनर्सवर उपमुख्यमंत्री देवेंद्र फडणवीस यांचा फोटो आहे. त्याखाली किंगमेकर असं लिहिलं आहे. याच बॅनर्सवर पंतप्रधान नरेंद्र मोदी, जेपी नड्डा आणि अमित शाह यांच्यासह पंकजा मुंडे तसेच रवींद्र चव्हाण यांचेही फोटो आहेत. उल्हासनगरला थेट मार्केट एरियामध्येच हे बॅनर्स लागले असल्याने उलट सुलट चर्चांना उधाण आलं आहे.
दरम्यान, उल्हानगरमध्ये काल ठाकरे गटाचे उपजिल्हाप्रमुख अरुण आशान यांनी खासदार डॉ. श्रीकांत शिंदेंच्या समर्थनार्थ बॅनर लावत भाजपच्या नेत्यांना डिवचलं होत. “कमजोर लोग ही शिकवा और शिकायत करते है, महान लोग तो हमेशा कर्म की वकालत करते है…! माझा नेता माझा अभिमान” अशा आशयाचे बॅनर उल्हासनगर कॅम्प 4 मध्ये लावण्यात आले होते.
या बॅनर्सवरील टीका भाजपच्या चांगलीच जिव्हारी लागली होती. त्यावर भाजप आमदार गणपत गायकवाड यांनी जोरदार प्रतिक्रिया दिली होती. ‘युतीची सत्ता आल्यावर काही छोटे छोटे कार्यकर्ते स्वत:ला एकनाथ शिंदे समजत आहेत. आम्हीच महाराष्ट्राचे मुख्यमंत्री आहोत, असा त्यांना गर्व झाला आहे, त्यांना वाटतं आमच्याशिवाय कोणीच नाही’, अशी खोचक टीका गणपतशेठ गायकवाड यांनी केली होती.
