मुंबई,दि.१६: अभिनेते शरद पोंक्षे (Sharad Ponkshe) यांनी खळबळजनक ट्वीट केले आहे. त्यांच्या ट्विची सोशल मीडियावर चर्चा आहे. आपल्या अभिनयाने प्रेक्षकांची मनं जिंकणारे अभिनेते शरद पोंक्षे सोशल मीडियावर प्रचंड सक्रिय असतात. त्यांचा हिंदुत्व आणि स्वातंत्र्यवीर सावरकर यांच्यावर प्रचंड अभ्यास आहे. ते सावरकरांचे विचार नेहमीच आपल्या भाषणांतून आणि सोशल मीडियाच्या माध्यमातून चाहत्यांपर्यंत पोहोचवत असतात. ते नेहमीच त्यांचे राजकीय आणि सामाजिक विचार बिनधास्तपणे मांडताना दिसतात. अनेकदा त्यांची वक्तव्य सोशल मीडियावर चर्चेचा विषय ठरतात. यापूर्वी त्यांच्या अनेक वक्तव्यामुळे वादही झाले आहेत. त्यावेळेसही त्यांनी केलेलं एक ट्विट नेटकऱ्यांमध्ये प्रचंड व्हायरल झालंय. त्यांनी सावरकरांनी म्हंटलेलं एक वाक्य पोस्ट करत आपल्याला इतर धर्मियांची नाही तर हिंदूंची भीती वाटत असल्याचं म्हटलं आहे. त्यांच्या या वक्तव्याची सोशल मीडियावर चर्चा आहे.
सावरकरांनी १०० वर्षांपूर्वी म्हटलेलं वाक्य आज खरं होतंय: शरद पोंक्षे
सावरकरांनी १०० वर्षांपूर्वी म्हटलेलं वाक्य आज खरं होतंय, आता ते वाक्य पटतंय अशा आशयाचं ट्वीट त्यांनी केलं आहे. शरद यांनी ट्वीट करत लिहिलं, ‘सातत्यानं सावरकर आठवतात १०० वर्षांपूर्वी ते म्हणाले की ‘मला मुसलमानांची,ख्रिश्चनांची भिती वाटत नाही, मला हिंदूंचीच भिती वाटते,कारण हिंदूच हिंदूत्वाच्या विरोधात ऊभे राहतात.’ या ट्वीटसोबत त्यांनी आणखी एक वादग्रस्त व्यक्तव्य केलं. त्यांनी लिहिलं, ‘ह्या पोस्टवर जी कुत्री भूंकतील त्यांना ‘हाड’ असंही म्हणणार नाही.’
त्यांच्या या वक्तव्याची सोशल मीडियावर प्रचंड चर्चा सुरू आहे. त्यांच्या या पोस्टवर अनेकांनी त्यांना विरोध केला आहे. पोंक्षे यांचे सावरकरांप्रती असलेले विचार, हिंदुत्वाप्रती असलेलं प्रेम सगळ्यांना ठाऊक आहि. मात्र आता त्यांचं हे ट्वीट सोशल मीडियावर व्हायरल होतंय. यापूर्वी शरद यांच्या वक्तव्याची नेटकऱ्यांमध्ये चर्चा होती. त्यांच्या ट्विटमुळे आता कोणता नवा वाद उभा राहणार याकडे सगळ्यांचं लक्ष लागलं आहे.
पोंक्षे सध्या झी मराठीवरील ‘दार उघड बये’ या मालिकेत मुख्य भूमिकेत आहेत. या मालिकेत ते नकारात्मक भूमिकेत आहे. तर या सोबतच ते स्टार प्रवाहवरील ‘ठिपक्यांची रांगोळी’ या मालिकेत दादा काकाची भूमिका साकारत आहेत.
