मुंबई,दि.12: काँग्रेस नेत्यांनी ऐकायची सवय ठेवावी. समोरच्याचे नीट ऐकणे मोठी गोष्ट असते. असे शिवसेना (ठाकरे गट) नेते खासदार संजय राऊत (Sanjay Raut) यांनी म्हटले आहे. येणाऱ्या महापालिका निवडणुका स्वबळावर लढणार असल्याचे संजय राऊत यांनी काल (दि.11) म्हटले होते. स्थानिक स्वराज्य संस्थांच्या निवडणुका स्वबळावर लढणार असल्याचे संकेत संजय राऊत यांनी दिले होते. राऊत यांच्या वक्तव्यानंतर काँग्रेस नेत्यांनी प्रतिक्रिया दिली होती.
यानंतर राऊत यांनी आज पत्रकार परिषदेत स्पष्टीकरण दिले आहे. महाविकास आघाडी, इंडिया आघाडी फुटली आहे असे मी किंवा शिवसेनेच्या कुठल्याही नेत्याने म्हटलेले नाही, असे स्पष्टीकरण शिवसेना ठाकरे गटाचे नेते, खासदार संजय राऊत यांनी दिले. तसेच महानगर पालिका स्वबळावर लढवावी अशी कार्यकर्त्यांची इच्छा आहे असेही संजय राऊत म्हणाले.
मुंबईत झालेल्या पत्रकार परिषदेत संजय राऊत म्हणाले की, उद्धव ठाकरे पक्ष प्रमुख आहेत. उद्धव ठाकरे सगळ्यांसोबत चर्चा करतात. काँग्रेस नेत्यांनी माझं विधान व्यवस्थित ऐकावं. काँग्रेस नेत्यांनी माझे विधान आधी नीटपणे ऐकावे. ऐकून घेण्याची सवय असली पाहिजे. काँग्रेस नेत्यांनी ऐकायची सवय ठेवावी. समोरच्याचे नीट ऐकणे मोठी गोष्ट असते. मी इतकंच म्हणालो की, लोकसभा निवडणुकीसाठी आम्ही सर्वांनी इंडिया आघाडी बनवली. विधानसभेसाठी आम्ही महाविकास आघाडी बनवली. आता स्थानिक स्वराज्य संस्थेची निवडणूक आहे आणि ही निवडणूक कार्यकर्त्यांची निवडणूक आहे.
सर्व कार्यकर्त्यांची इच्छा आहे की निवडणूक आपण लढवावी. जेव्हा तीन ते चार पक्ष एकत्र निवडणूक लढवतात तेव्हा कार्यकर्त्यांवर अन्याय होतो. यासाठी आमच्या पक्षाच्या कार्यकर्त्यांची भावना आहे, त्या उद्धव ठाकरे जाणून घेत आहेत असे संजय राऊत म्हणाले.
