दि.2: रशिया आणि युक्रेनमध्ये (Russia Ukraine War) सुरू असलेल्या युद्धाचा आज सातवा दिवस आहे. रशियन सैन्य युक्रेनची राजधानी कीववर सतत बॉम्बफेक करत आहे, क्षेपणास्त्रे डागत आहे. याशिवाय रशियन सैन्याने खेरसन Kherson शहर ताब्यात घेतले असून खार्किवपर्यंतही सैनिक पोहोचले आहेत.
आज युक्रेन आणि रशिया यांच्यातील बैठकीची दुसरी फेरी होणार आहे. यात काहीतरी तोडगा निघण्याची आशा आहे, ज्यामुळे युद्ध थांबेल. आज सकाळी अमेरिकन राष्ट्राध्यक्षांनी आपल्या भाषणात म्हटले की, पुतिन यांनी युक्रेनवर हल्ला करून मोठी चूक केली आहे.
रशियाने युक्रेनवरील हल्ले आणखी तीव्र केले असताना अमेरिकेचे राष्ट्राध्यक्ष जो बायडन यांनी मोठी घोषणा केली आहे. अमेरिकेच्या ‘स्टेट ऑफ द युनियन’ला संबोधित करताना त्यांनी रशियावर जोरदार टीका केली. युक्रेनवर हल्ला करून पुतीन यांनी घोडचूक केली आहे. रशियाची आणखी आर्थिक कोंडी करणार असून अमेरिकेची हवाई हद्द रशियासाठी बंद करण्यात आल्याची घोषणा बायडन यांनी केली आहे.
रशियाने पुकारलेल्या युद्धाची किंमत त्यांना मोजावी लागणार आहे. आम्ही रशियावर आर्थिक निर्बंध लागू करत आहोत असे बायडन यांनी सांगितले. फक्त अमेरिकाच नव्हे तर जगातील इतर अनेक देश युक्रेनसोबत उभे असल्याचे त्यांनी म्हटले. अमेरिकेने रशियाची हवाई हद्द बंद केली असल्याची घोषणा त्यांनी केली.
