Russia Ukraine War: युक्रेनमध्ये रशियन हल्ल्यांमुळे परिस्थिती आता दिवसेंदिवस बिकट होत चालली आहे. अशाच एका हवाई हल्ल्यात खार्किवमध्ये एका भारतीय विद्यार्थ्याचा मृत्यू झाला आहे. परराष्ट्र मंत्रालयाचे प्रवक्ते अरिंदम बागची (Arindam Bagchi) यांनी ही माहिती दिली आहे. नवीन शेखराप्पा असे मंगळवारी रशियन हल्ल्यात ठार झालेल्या भारतीय विद्यार्थ्याचे नाव आहे. तो कर्नाटकचा रहिवासी होता.
आज सकाळपासून रशियाने युक्रेनच्या सर्व प्रमुख शहरांमध्ये हल्ले तीव्र केले आहेत. रशियन सैन्याचा मोठा ताफा कीवच्या दिशेने वेगाने पुढे जात आहे.
अरिंदम बागची म्हणाले की, खार्किव येथे झालेल्या हवाई हल्ल्यात एका भारतीय विद्यार्थ्याचा मृत्यू झाल्याची माहिती देताना मला अत्यंत दु:ख होत आहे. सध्या मंत्रालय विद्यार्थ्याच्या कुटुंबीयांच्या संपर्कात आहे. आमच्या संवेदना कुटुंबासोबत आहेत.
भारतीय परराष्ट्र सचिव रशिया आणि युक्रेनच्या राजदूतांच्या संपर्कात असल्याची माहिती अरिंदम बागची यांनी दिली आहे. यामध्ये भारतीय विद्यार्थी आणि नागरिकांना बाहेर जाण्यासाठी सुरक्षित रस्ता देण्यात यावा, अशी मागणी करण्यात आली आहे कारण अजूनही अनेक विद्यार्थी खार्किव आणि इतर शहरांमध्ये अडकले आहेत.
लवकरात लवकर कीव सोडण्याच्या सूचना
युक्रेनची राजधानी कीवमधील बिघडलेल्या परिस्थितीच्या पार्श्वभूमीवर भारतीय दूतावासाने आज कडक सूचना जारी केल्या आहेत. सर्व भारतीय नागरिक आणि विद्यार्थ्यांनी लवकरात लवकर कीव सोडावे, असे त्यात म्हटले आहे. कीव सोडण्यासाठी मिळालेले साधन त्यांनी ताबडतोब हस्तगत करावे, असे सूचनेत म्हटले होते. यामध्ये रेल्वे, बस आदींनी प्रवास करण्याचा सल्ला देण्यात आला होता.
