सोलापूर,दि.7: Operation Sindoor | दहशतवादाविरुद्ध मोठी कारवाई करत भारताने मंगळवारी रात्री १.३० वाजता ९ दहशतवादी तळांवर हवाई हल्ला केला. या हल्ल्याला ‘ऑपरेशन सिंदूर’ असे नाव देण्यात आले आहे. हे तिन्ही सैन्यांचे संयुक्त ऑपरेशन होते. भारताच्या बलाढ्य सैन्याने पाकिस्तानमधील ४ आणि पीओकेमधील ५ ठिकाणांना लक्ष्य केले आहे.
भारतीय गुप्तचर संस्था रॉ ने सर्व लक्ष्ये ओळखली होती, त्यानंतर संपूर्ण नियोजनाने लष्कर आणि जैशच्या तळांवर हल्ला करण्यात आला. ही ठिकाणे कोणती आहेत आणि ती आंतरराष्ट्रीय सीमेपासून किती अंतरावर आहेत ते जाणून घेऊयात. (Operation Sindoor Marathi News)
बहावलपूर – आंतरराष्ट्रीय सीमेपासून सुमारे १०० किमी अंतरावर असलेले हे जैश-ए-मोहम्मदचे मुख्यालय होते, जे भारतीय सैन्याने उद्ध्वस्त केले आहे.
मुरीडके – हे दहशतवाद्यांचे अड्डे आंतरराष्ट्रीय सीमेपासून ३० किमी अंतरावर आहे. २६/११ च्या मुंबई हल्ल्याशी लष्कर-ए-तैयबा कॅम्पचा संबंध होता.
गुलपूर – हे दहशतवाद्यांचे अड्डे नियंत्रण रेषेपासून (पुंछ-राजौरी) ३५ किलोमीटर अंतरावर आहे.
लष्कर कॅम्प सवाई – हे दहशतवाद्यांचे अड्डे पीओके तंगधार सेक्टरच्या आत ३० किमी अंतरावर आहे.
बिलाल कॅम्प – जैश-ए-मोहम्मदचा लाँचपॅड, या लपण्याच्या जागेचा वापर दहशतवाद्यांना सीमेपलीकडे पाठवण्यासाठी केला जात असे.
कोटली – नियंत्रण रेषेपासून १५ किमी अंतरावर असलेला लष्कर कॅम्प. हे ५० हून अधिक दहशतवादी राहू शकतील अशी क्षमता असलेले लपण्याचे ठिकाण होते.
बर्नाला कॅम्प – हे दहशतवाद्यांचे अड्डे नियंत्रण रेषेपासून १० किमी अंतरावर होते.
सरजल कॅम्प – सांबा-कठुआच्या समोरील आंतरराष्ट्रीय सीमेपासून ८ किमी अंतरावर असलेले जैशचे प्रशिक्षण केंद्र.
मेहमूना कॅम्प (सियालकोट जवळ) – हा हिजबुल मुजाहिदीनचा प्रशिक्षण कॅम्प होता आणि आंतरराष्ट्रीय सीमेपासून १५ किमी अंतरावर होता.
लक्ष्य निवडताना भारताने संयम बाळगला: संरक्षण मंत्रालय | Operation Sindoor
भारताच्या हवाई हल्ल्यानंतर संरक्षण मंत्रालयाने जारी केलेल्या प्रेस रिलीजमध्ये असे म्हटले आहे की, ‘काही वेळापूर्वी, भारतीय सशस्त्र दलांनी ‘ऑपरेशन सिंदूर’ सुरू केले, ज्यामध्ये पाकिस्तान आणि पीओकेमध्ये असलेल्या दहशतवादी तळांना लक्ष्य केले गेले, जिथून भारताविरुद्ध दहशतवादी हल्ले आखले जात होते आणि ते अंमलात आणले जात होते.’ पुढे असे म्हटले होते की एकूण 9 ठिकाणांना लक्ष्य करण्यात आले होते. त्यात स्पष्टपणे म्हटले आहे की आमची कृती चिथावणीखोर नाही. कोणत्याही पाकिस्तानी लष्करी आस्थापनेला लक्ष्य केलेले नाही. भारताने आपले लक्ष्य निवडताना संयम बाळगला आहे.
पाकिस्तानी लष्कराचेही विधान आले समोर
भारताच्या हवाई हल्ल्यानंतर पाकिस्तानी लष्कराचेही विधान समोर आले आहे. पाक सैन्याने सांगितले की, ६ ठिकाणी २४ हल्ले करण्यात आले. यामध्ये ८ जणांचा मृत्यू झाला आहे, तर ३३ जण जखमी झाले आहेत. त्याच वेळी, भारतीय सैन्याच्या हवाई हल्ल्यानंतर घाबरलेला पाकिस्तान नियंत्रण रेषेवर सतत युद्धबंदीचे उल्लंघन करत आहे. ६-७ मे च्या रात्री, पाकिस्तानी सैन्याने नियंत्रण रेषेवरील आणि जम्मू आणि काश्मीरच्या समोरील आंतरराष्ट्रीय सीमेवरील त्यांच्या चौक्यांवर विनाकारण गोळीबार आणि तोफांचा मारा केला. या अंदाधुंद गोळीबार आणि तोफगोळ्यात तीन नागरिकांना आपला जीव गमवावा लागला. या कारवाईला भारतीय लष्कराने चोख प्रत्युत्तर दिले आहे.
