मुंबई,दि.१: राष्ट्रवादीचे नेते अल्पसंख्याक मंत्री नवाब मलिक (Nawab Malik) यांनी एनसीबीचे समीर वानखेडे यांच्यावर अनेक गंभीर आरोप केले आहेत. आर्यन खान ड्रग प्रकरणापासून नवाब मलिक सातत्याने खळबळजनक दावे करत आहेत. आज पुन्हा एकदा नवाब मलिक यांनी एक ट्वीट करत खळबळ उडवून दिली आहे. विरोधीपक्ष नेते देवेंद्र फडणवीस यांची पत्नी अमृता फडणवीस (Amruta Fadanvis) यांचा एक फोटो ट्वीट केला आहे.
राजकीय विश्लेषकांनी केलेल्या एका ट्वीटचा आधार घेत नवाब मलिक यांनी भाजपला लक्ष्य केलं आहे. आज सकाळीच त्यांनी ट्विटरवरुन अमृता फडणवीसांचा फोटो शेअर केला आहे. या फोटोत अमृता फडणवीस यांच्यासोबत फोटोत असणारी व्यक्ती ड्रग्ज पेडलर असल्याचा दावा करण्यात येत आहे.
चलो भाजपा और ड्रग्ज पेडलर के रिश्तों पे चर्चा करते है, असं म्हणत नवाब मलिकांनी हा फोटो ट्विट केला आहे. तर, अन्य एका ट्वीटमध्ये या व्यक्तीचे नाव जयदीप राणा असल्याची माहिती नवाब मलिकांनी दिली आहे. तसंच, या ट्वीटनंतर आपण थोड्याच वेळात पत्रकार परिषद घेणार असल्याचंही त्यांनी म्हटलं आहे. या पत्रकार परिषदेत ते आणखी काय खुलासा करणार, हे पाहणं महत्त्वाचं ठरणार आहे.
