मुंबई,दि.३०: निवडणूक आयोगाने अचानक काही ठिकाणच्या नगरपरिषद निवडणुका पुढे ढकलल्या आहेत. २ डिसेंबरला मतदान होणार होते तर ३ डिसेंबरला मतमोजणी होणार होती. ४ नोव्हेंबरपासून आचारसंहिता लागू करण्यात आली आहे. अशातच राज्यात ज्या ज्या ठिकाणी नगरपरिषदाच्या अध्यक्षपदावरून आक्षेप आहे त्या ठिकाणी सर्वच निवडणुका पुढे ढकलण्यात आल्या आहेत.
पुणे जिल्ह्यातील बारामती तालुक्यासह अहिल्यानगर जिल्ह्यातील 12 पैकी 4 नगरपरिषद निवडणुका पुढे ढकलल्या आहेत. नगरपंचायतींमध्ये 50 टक्के आरक्षणाची मर्यादा ओलांडली गेल्याची कबुली राज्य निवडणूक आयोगानं दिली आहे. बारामती नगरपरिषद निवडणूक प्रक्रिया पुढे ढकलली आहे.
त्यामुळे आता २ डिसेंबरऐवजी २० डिसेंबर रोजी नगराध्यक्षपदासह इतर सर्व ४१ नगरसेवकांच्या निवडणुकीचे मतदान होणार आहे. ज्या-ज्या नगरपरिषदेमध्ये निवडणूक निर्णय अधिकाऱ्यांच्या विरोधात संबंधित उमेदवारांनी दाद मागितली होती, मात्र २२ नोव्हेंबरपर्यंत निकाल जाहीर न झालेल्या ठिकाणी निवडणुका स्थगित करण्यात आल्या आहेत. यामध्ये बारामती नगरपरिषद निवडणुकीचाही समावेश आहे.
बारामती नगरपरिषदेच्या विरोधात उमेदवारांच्या संदर्भात न्यायालयाचा अपील दाखल झाले होते, याशिवाय प्रभाग क्रमांक प्रभाग क्रमांक 13 (ब) व प्रभाग क्रमांक 17 (अ) या दोन प्रभागांतील निवडणुका अगोदरच तात्पुरत्या स्थगित करण्यात आल्या होत्या. निवडणूक जाहीर झाल्यानंतर आणि अर्ज माघारी घेण्याची अंतिम तारीख संपल्यानंतर या दोन जागांसाठी न्यायालयाच्या आदेशानुसार 26 नोव्हेंबर रोजी नव्याने दोन उमेदवारी अर्ज दाखल झाले होते. भाजपचे नेते सतीश फाळके व अविनाश गायकवाड यांनी न्यायालयात दाखल केलेल्या याचिकेवर सुनावणी झाल्यानंतर बारामती न्यायालयाने या दोघांचेही उमेदवारी अर्ज दाखल करून घेण्याचे आदेश निवडणूक आयोगाला दिले होते.
