औरंगाबाद,दि.२७: MIMचे खासदार इम्तियाज जलील (Imtiyaz Jaleel) यांनी शिवसेना राज्यमंत्र्याबाबत मोठा खुलासा केला आहे. एमआयएमकडून राष्ट्रवादी-कॉंग्रेस आणि शिवसेनेला आलेल्या युतीच्या प्रस्तावामुळे राजकीय वातावरण तापले असतानाच आता खासदार इम्तियाज जलील (Imtiyaz Jaleel) यांनी मोठा गौप्यस्फोट केला आहे. औरंगाबाद लोकसभा मतदारसंघात आपल्याला खासदार करण्यासाठी शिवसेनेचे राज्यमंत्री अब्दुल सत्तार यांचा सिंहाचा वाटा असल्याचा गौप्यस्फोट जलील यांनी केला असल्याने अनेकांच्या भुवया उंचावल्या आहेत.
वैजापूरच्या खंडाळा येथे एका कार्यक्रमात जलील बोलले. लोकसभा निवडणुकीत मला सत्तार यांची मोठी मदत मिळाली. त्यामुळे मला खासदार करण्यासाठी शिवसेनेचे राज्यमंत्री अब्दुल सत्तार यांचा सिंहाचा वाटा असल्याचं जलील म्हणाले. तर पक्ष वेगवेगळे असले तरी इम्तियाज जलील यांच्यासोबत असलेली आपली मैत्री घट्ट आहे, असे अब्दुल सत्तार म्हणाले.
सत्तारांची जलील यांच्याकडून स्तुती
यावेळी कार्यक्रमात आपल्या भाषणात जलील यांनी अब्दुल सत्तार यांची स्तुती केली. तर सत्तार हे औरंगाबादचे किंगमेकर झाले आहेत. राजकारणात एखाद्यावर त्यांची कृपादृष्टी झाल्यास त्याचे नशीब बदलून जाते. मात्र एखाद्यावर सत्तार नाराज झाल्यास त्याचा वाईट काळ सुरू होते, असेही जलील म्हणाले.
शिवसेनेचा बालेकिल्ला समजल्या जाणाऱ्या औरंगाबादमध्ये लोकसभा निवडणुकीत जलील यांच्या विजयामुळे शिवसेना उमेदवार चंद्रकांत खैरे यांना पराभव स्वीकारावा लागला होता. आता सत्तार सुद्धा शिवसेनेत आहे. त्यात सत्तार यांच्या मदतीमुळे आपला विजय झाल्याचे जलील यांच्या विधानामुळे आता अनेकांच्या भुवया उंचावल्या आहेत. तर खैरे यावर काय प्रतिक्रिया देतील हे पाहणे महत्वाचे ठरणार आहे.
