मुंबई,दि.15: “महाराष्ट्राच्या राजकारणात जेवढं माझं वय आहे, तितकं शरद पवारांची राजकीय कारकीर्द” असे भाजपा नेते उपमुख्यमंत्री देवेंद्र फडणवीस यांनी आजतकला दिलेल्या मुलाखतीत म्हटलं आहे. नुकत्याच झालेल्या लोकसभा निवडणुकीत पंतप्रधान नरेंद्र मोदींसह सर्वच नेत्यांनी राष्ट्रवादीचे (शरद पवार गट) अध्यक्ष शरद पवारांना टार्गेट केले होते. सर्वच नेत्यांनी शरद पवारांवर जोरदार टीका केली होती. मात्र आता राज्यात विधानसभा निवडणुकीत शरद पवारांवर टीका करताना दिसून येत नाही. लोकसभा निवडणुकीत महाराष्ट्रात भाजपाला मोठा फटका बसला होता.
आता भाजपाचे नेते शरद पवारांवर सरळ टीका करणे टाळत असल्याचे दिसून येते. आजतकला दिलेल्या मुलाखतीत फडणवीस यांना शरद पवार 2024 लोकसभा निवडणुकीत मोठे फॅक्टर होते का? असा प्रश्न विचारण्यात आला. यावर फडणवीस यांनी उत्तर दिले.
काय म्हणाले फडणवीस?
“महाराष्ट्राच्या राजकारणात जेवढं माझं वय आहे, तितकं शरद पवारांची राजकीय कारकीर्द आहे. महाराष्ट्रात शरद पवार नेहमी फॅक्टर राहिले आहेत आणि राहतील. त्यामुळे त्यांना महाराष्ट्राचं राजकारण कळतं. महाविकास आघाडी तयार झाली आहे, ती शरद पवारांनी तयार केलेली आहे.”
