मुंबई,दि.११: शिवसेना नेते संजय राऊत (sanjay raut) यांनी भाजपा नेते किरीट सोमय्या (kirit somaiya) नील सोमय्या (nil somaiya) देशाबाहेर पळून जाण्याच्या तयारीत आहेत, असा खळबळजनक दावा केला आहे. आयएनएस विक्रांत आर्थिक अपहार प्रकरणात समन्स बजावूनही चौकशीला हजर न झालेले भाजप नेते किरीट सोमय्या आणि त्यांचा मुलगा नील सोमय्या हे देशाबाहेर पळून जाण्याच्या तयारीत असल्याचा गंभीर आरोप शिवसेना नेते संजय राऊत (Sanjay Raut) यांनी केला. आयएनस विक्रांत युद्धनौका वाचवण्याच्या नावाखाली पैसे गोळा करण्यात आले. हे प्रकरण लहान नाही. या प्रकरणाची व्याप्ती खूप मोठी आहे. त्यामुळे आता या प्रकरणात किरीट सोमय्या यांना वाचवण्यासाठी बनावट पुरावे तयार केले जाऊ शकतात, अशी भीतीही संजय राऊत यांनी व्यक्त केली. ते सोमवारी मुंबईत प्रसारमाध्यमांशी बोलत होते.
आयएनस विक्रांत आर्थिक अपहार प्रकरणात भाजपकडून अद्यापपर्यंत अधिकृतपणे भाष्य का करण्यात आलेले नाही? किरीट सोमय्या आणि त्यांचा मुलगा नील हे दोघेही सध्या महाराष्ट्राबाहेर आहेत. भाजपने त्यांना लपवून ठेवले आहे. सध्या या दोघांकडून अटकपूर्व जामीन मिळवण्यासाठी प्रयत्न केले जात आहेत. त्यासाठी भाजपकडून ‘सेटिंग’ लावली जात आहे. परंतु, हे प्रयत्न यशस्वी होणार नाही. परिणामी अटकपूर्व जामीन मिळेपर्यंत किरीट सोमय्या आणि नील सोमय्या हे देशाबाहेर पळून जाण्याच्या तयारीत आहेत. या दोघांविरोधात लूकआऊट नोटीस जारी केली पाहिजे, अशी मागणी संजय राऊत यांनी केली.
यावेळी संजय राऊत यांनी राजभवनालाही इशारा दिला. राजभवनाने देशविरोधी कृत्यामध्ये सामील होऊ नये. किरीट सोमय्या आणि त्यांच्या माफिया मुलाच्या टोळीने लोकांना धमकी देऊन कोट्यवधी रुपये गोळा केले आहेत. आयएनस विक्रांत प्रकरणात बनावट पुरावे तयार करण्याचे काम सुरु आहे. मी राजभवनाला इशारा देतोय की, काही चुकीचं केलंतर तर राजभवनाची उरलीसुरील इज्जतही जाईल. मुंबई पोलीस हे या प्रकरणातील आरोपांनी कुठूनही पकडून आणतील, असे संजय राऊत यांनी म्हटले.
माजी सैनिक बबन भोसले यांच्या तक्रारीनंतर ट्रॉम्बे पोलिसांनी किरीट सोमय्या आणि नील सोमय्या यांच्याविरोधात गुन्हा दाखल केला होता. या दोघांना शनिवारी पोलीस ठाण्यात हजर राहण्यासाठी समन्स बजावण्यात आले होते. मात्र, सोमय्या पितापुत्रांनी पूर्वनियोजित कार्यक्रमांचे कारण देत आज चौकशीला येणे टाळले होते.
