मुंबई,दि.9: महाराष्ट्रात तिसऱ्या टप्प्याचे मतदान 7 मे ला झाले. आता चौथ्या टप्प्यातील मतदान 13 मेला होणार आहे. आता लोकसभा निवडणुकीच्या उत्साहात 93 मध्ये झालेल्या बॉम्बस्फोटातील आरोपी इब्राहिम मुसा हे मुंबई उत्तर पश्चिमचे उमेदवार अमोल कीर्तिकर यांच्या प्रचारात उतरले आहेत. अमोल कीर्तिकर यांना उत्तर पश्चिम मुंबई मतदारसंघातून शिवसेना ठाकरे गटाने उमेदवारी दिली आहे.
इब्राहिम मुसा हा तोच आरोपी आहे ज्याने 93 बॉम्बस्फोटावेळी शस्त्रे पुरवली होती आणि या आरोपीला न्यायालयाने 10 वर्षांची शिक्षा सुनावली होती. अशा परिस्थितीत उद्धवबाळासाहेब ठाकरे गटाचे शिवसेनेचे उमेदवार अमोल कीर्तिकर यांच्या प्रचारात इब्राहिम मुसा यांनी सहभाग घेतल्याने भाजपाला आयता एक मुद्दा मिळाला आहे.
उत्तर-पश्चिम मुंबईत ठाकरे गटाचे अमोल कीर्तिकर यांचा सामना सत्ताधारी सेनेचे रवींद्र वायकर यांच्याशी होणार आहे. पूर्वी शिवसेना (ठाकरे गट) असलेले वायकर नुकतेच शिंदे गटामध्ये दाखल झाले आहेत. सध्या ते मुंबईतील जोगेश्वरी पूर्व विधानसभा मतदारसंघातून आमदार आहेत.
मुंबईत 1993 मध्ये झाले होते बॉम्बस्फोट
12 मार्च 1993 रोजी दुपारी मुंबई स्टॉक एक्सचेंजमध्ये मोठा स्फोट झाला होता. असा स्फोट, ज्याचे प्रतिध्वनी दूरदूरपर्यंत गेले. सगळीकडे गोंधळ माजला होता. या गोंधळात लोकांना काही समजण्याआधीच अवघ्या 2 तास 10 मिनिटांत मुंबईत 12 स्फोट झाले. यामध्ये 257 लोकांचा मृत्यू झाला, तर 700 हून अधिक लोक जखमी झाले.
त्याचा सूत्रधार दाऊद इब्राहिम शेजारील देश पाकिस्तानमध्ये मौजमजा करत आहे. भारतीय सुरक्षा यंत्रणांनी अनेक आरोपींना अटक केली. काही दोषींना जन्मठेपेची शिक्षा झाली. या बॉम्बस्फोटांच्या 48 तासांत मुंबई पोलिसांनी आरोपींची ओळख पटवली होती. तत्कालीन डीसीपी राकेश मारिया यांच्या नेतृत्वाखाली 150 पोलिसांचे पथक तपासात गुंतले होते.
माहीममध्ये उभ्या असलेल्या स्कूटरमधून ही महत्त्वाची लिंक सापडली. त्यात आरडीएक्स ठेवले होते. पण त्याचा स्फोट झाला नाही. बॉम्बस्फोटासाठी आरडीएक्सचा वापर करण्याची ही पहिलीच वेळ होती. 1 एप्रिल 1994 रोजी टाडाच्या विशेष न्यायालयात या प्रकरणाची सुनावणी सुरू झाली.
