सोलापूर,दि.1: कोरोनाचा (Corona) डेल्टा प्रकार आतापर्यंत सर्वात धोकादायक मानला जात होता, परंतु नवीन प्रकार ओमिक्रॉन व्हेरिएंट (Omicron Variant) डेल्टापेक्षा जास्त संसर्गजन्य असल्याचे सांगितले जात आहे. या प्रकाराचे पहिले प्रकरण आफ्रिकेत आढळले. सीरम इन्स्टिट्यूट ऑफ इंडियाचे सीईओ अदार पूनावाला (Adar Poonawalla) यांनी म्हटले आहे की, कोविशील्ड लस (covishield Vaccine) कोरोनाच्या ओमिक्रॉन प्रकाराविरूद्ध किती प्रभावी आहे, हे येत्या 2-3 आठवड्यांत कळेल. एका वृत्तवाहिनीशी विशेष संवाद साधताना पूनावाला म्हणाले की,ओमिक्रॉन अधिक गंभीर आहे की नाही हे आत्ताच सांगता येणार नाही. Omicron चा धोका लक्षात घेऊन बूस्टर डोस शक्य आहे. मात्र, सध्या तरी प्रत्येकाला कोरोना लसीचे दोन्ही डोस देण्यावर सरकारचे लक्ष असायला हवे, असे त्यांचे म्हणणे आहे.
लॅन्सेट अभ्यासात असे आढळून आले की डेल्टा प्रकाराच्या कहरातही कोविशील्ड विषाणूचा सामना करण्यासाठी खूप प्रभावी ठरली आहे आणि यामुळे रुग्णालयात दाखल होण्याची आणि मृत्यूची शक्यता लक्षणीयरीत्या कमी झाली. पूनावाला म्हणाले की ओमिक्रॉनवर कोविशील्डच्या परिणामाबद्दल अभ्यास सुरू आहेत आणि आपणास काही आठवडे प्रतीक्षा करावी लागेल. ऑक्सफर्डचे शास्त्रज्ञ संशोधनात गुंतले आहेत आणि त्यांच्या निष्कर्षांवर आधारित, आम्ही एक नवीन लस आणू शकतो, जी येत्या सहा महिन्यांत बूस्टर डोस म्हणून सादर केली जाऊ शकते.
ऑक्सफर्ड विद्यापीठातील शास्त्रज्ञांनी म्हटले आहे की अस्तित्वात असलेल्या लसी ओमिक्रॉन विरूद्ध काही संरक्षण प्रदान करणार नाहीत असा कोणताही पुरावा नाही. गेल्या वर्षभरात नवीन प्रकार दिसू लागले असूनही लसींनी गंभीर आजारांपासून अत्यंत उच्च पातळीचे संरक्षण प्रदान केले आहे, असे विद्यापीठाने मंगळवारी सांगितले. ऑक्सफर्डच्या शास्त्रज्ञांनी सांगितले की, ओमिक्रॉनने सर्वांना आश्चर्यचकित केले आहे. कारण त्यात म्यूटेशनची संख्या जास्त आहे.. ही डेल्टा प्रकारापेक्षा खूप जास्त आहे.
सीरमचे सीईओ (Serum Institute of India) पूनावाला म्हणाले की कोविशील्डची परिणामकारकता कालांतराने कमी होणे आवश्यक नाही. तथापि, त्यांनी पुनरुच्चार केला की त्यांचा संदेश असा आहे की प्रत्येकाला कोविड लसीचे दोन्ही डोस दिले पाहिजेत. यानंतरच पुढच्या वर्षी आपण प्रतिकारशक्ती वाढवण्यासाठी बूस्टर डोस देण्याचा विचार करू शकतो.
जर सरकारने बूस्टर डोस देण्याचा निर्णय घेतला, तर आम्ही पुरवठा करण्यास तयार आहोत. पूनावाला यांच्या मते, बूस्टर डोस खाजगी बाजारात 600 रुपयांना मिळू शकतो. तज्ज्ञांच्या सल्ल्यानंतर बूस्टर डोस दिला जाऊ शकतो. परंतु बूस्टर डोस देण्यापूर्वी लसीचे दोन्ही डोस प्रत्येकाला देणे आवश्यक आहे.
पूनावाला यांच्या म्हणण्यानुसार, आमच्याकडे स्टॉकमध्ये लाखो लसीच्या डोसचा साठा आहे. आम्ही राज्ये आणि केंद्रशासित प्रदेशांसाठी 20 कोटी लसीचे डोस आरक्षित केले आहेत. अशा परिस्थितीत सरकारने बूस्टर डोस जाहीर केल्यास आम्ही त्यांना पुरेसा पुरवठा करू शकतो. आमच्याकडे कोविड-19 विरुद्धची नवीन स्वदेशी लस Covovax चाही पुरेसा साठा आहे. येत्या काही आठवड्यांत याला वापरासाठी मंजुरी मिळू शकते. Covishield च्या किंमतीत कोणताही बदल होणार नाही. यासाठी निश्चित किंमत आहे आणि आम्ही ती राखू. Covavax डोस भारतात जानेवारी-फेब्रुवारीपर्यंत उपलब्ध होऊ शकतो.
