सोलापूर,दि.२७: गुंजेगाव (ता. मंगळवेढा) येथील रिना आप्पासाहेब ढोबळे आणि चंद्रकांत तात्यासाहेब पाटील यांच्या दुहेरी हत्याकांड प्रकरणात अटकेत असलेला आरोपी गणेश लक्ष्मण ढोबळे याची मुंबई उच्च न्यायालयाच्या (High Court) कोल्हापूर सर्किट बेंचने जामिनावर मुक्तता केली आहे.
या प्रकरणाची हकीकत अशी की, मृत (Deceased) रिना ढोबळे आणि शेजारील शेतकरी लक्ष्मण ढोबळे यांच्यात पाईपलाईन चेंबरच्या कारणावरून जुने वैमनस्य (Prior Enmity) होते. याच वादातून ११ मार्च २०२५ रोजी सकाळी ९:३० वाजता रिना ढोबळे आणि चंद्रकांत पाटील यांची लोखंडी कोयता, हातोडा व पाईपने मारून हत्या करण्यात आली होती. याप्रकरणी मंगळवेढा पोलिसांनी गणेश ढोबळे याच्यासह सात जणांविरुद्ध दोषारोपपत्र (Charge-sheet) दाखल केले होते.
सुरुवातीला पंढरपूर सत्र न्यायालयाने (Sessions Court) गणेश ढोबळे याचा जामीन अर्ज फेटाळला होता. त्यानंतर आरोपीतर्फे ॲड. जयदीप माने यांनी उच्च न्यायालयात जामीन अर्ज दाखल केला. सुनावणी दरम्यान ॲड. माने यांनी युक्तिवाद (Argument) करताना आरोपीच्या प्रत्यक्ष सहभागाबाबत साक्षीदारांच्या जबाबातील विसंगती (Inconsistencies) न्यायालयाच्या निदर्शनास आणून दिली. हा युक्तिवाद ग्राह्य धरत न्यायालयाने गणेश ढोबळे याला जामीन (Bail) मंजूर केला. या प्रकरणात सरकार पक्षातर्फे (Prosecution) ॲड. एन. बी. पाटील यांनी काम पाहिले.
