दि.17: Gyanvapi Masjid Updates: ज्ञानवापी मशिदीचे सर्वेक्षण पूर्ण झाले आहे. त्यावर आज वाराणसी न्यायालयात सुनावणी झाली. न्यायालयाच्या आयुक्तांनी अहवाल सादर करण्यासाठी दोन दिवसांची मुदत मागितली होती. न्यायालयाने ही वेळ दिली आहे. दुसरीकडे, मशीद कमिटीच्या वतीने सर्वोच्च न्यायालयात याचिका दाखल करण्यात आली असून, त्यावर सुनावणी सुरू आहे. सर्वेक्षणाचा आदेशच अन्यायकारक असल्याचे मुस्लीम पक्षाचे म्हणणे आहे.
ज्ञानवापी मशिदीतील सर्वेक्षणाचे काम पूर्ण झाल्यानंतर हा वाद आणखी वाढला आहे. मशिदीच्या आवारात शिवलिंग सापडल्याचा दावा हिंदू बाजूने केला जात आहे, तर मुस्लिम बाजूने ते शिवलिंग नसून कारंजे असल्याचा दावा करण्यात आला आहे. त्यावर आज वाराणसी न्यायालयात सुनावणी झाली. न्यायालयीन आयुक्तांनी पाहणी अहवाल सादर करण्यासाठी आणखी दोन दिवसांची मुदत मागितली होती. न्यायालयाने ही वेळ दिली आहे.
दरम्यान, न्यायालयाचे आयुक्त अजय मिश्रा यांना हटवण्यात आले आहे. अजय मिश्राचे सहकारी आरपी सिंह मीडियाला माहिती लीक करत असल्याचा दावा केला जात आहे. याशिवाय मुस्लिम पक्षाने अजय मिश्रा यांना हटवण्याची मागणीही केली होती. त्याच वेळी, अजय प्रताप सिंग आणि विशाल सिंग हे सर्वेक्षण टीमचा भाग राहतील.
सुप्रीम कोर्टातही या प्रकरणावर आज सुनावणी झाली आहे. मशीद समितीच्या याचिकेवर ही सुनावणी होत आहे. समितीने सर्वोच्च न्यायालयात दाखल केलेल्या याचिकेत सर्वेक्षण करण्यावर प्रश्न उपस्थित केले आहेत.
नमाजावर बंदी घालणे योग्य नाही : सुप्रीम कोर्ट
सुनावणीदरम्यान सॉलिसिटर जनरल मेहता यांनी आक्षेप घेत म्हटले की, वृत्तात शिवलिंग विहिरीत सापडल्याचे म्हटले आहे. नमाज आणि वजूला परवानगी दिल्यास अडचणी निर्माण होऊ शकतात. यावर मुस्लीम पक्षाने सांगितले की, 16 मे रोजी दिलेला कनिष्ठ न्यायालयाचा आदेश अयोग्य होता. असा आदेश पारित करता येणार नाही. नमाजांवर बंदी घालणे योग्य नाही, असे सर्वोच्च न्यायालयाने म्हटले आहे. ते कसे करायचे हे स्थानिक प्रशासनाने ठरवावे.
सुनावणी गुरुवारपर्यंत पुढे ढकलण्यात आली
ज्ञानवापी प्रकरणाची सुनावणी सर्वोच्च न्यायालयाने गुरुवारपर्यंत (19 मे) पुढे ढकलली आहे. SC ने मंगळवारच्या सुनावणीदरम्यान सांगितले की, जर तेथे शिवलिंग असेल तर, मुस्लिमांच्या प्रार्थना करण्याच्या अधिकारावर कोणताही परिणाम न करता शिवलिंग संरक्षित केले जाईल याची खात्री डीएमने करावी.
शिवलिंगाचे रक्षण करा-SC
सुप्रीम कोर्टात सुरू असलेल्या सुनावणीदरम्यान न्यायमूर्ती चंद्रचूड म्हणाले की, शिवलिंग सापडलेल्या जागेचे संरक्षण जिल्हा दंडाधिकाऱ्यांनी करावे, असा आदेश आम्ही जारी करू. पण नमाज पढणाऱ्या लोकांना आडचण येऊ नये.
