मुंबई,दि.10: Double Decker Bus Accident: उत्तर प्रदेशातील उन्नावमध्ये एक भीषण रस्ता अपघात झाला आहे. येथे लखनौ-आग्रा एक्सप्रेसवेवर टँकर आणि डबल डेकर बसची टक्कर झाली, त्यानंतर बस अनेक वेळा उलटली. या अपघातात 18 प्रवाशांचा मृत्यू झाला, तर 19 हून अधिक जण जखमी झाल्याचे सांगण्यात येत आहे.
Double Decker Bus Accident डबल डेकर बसचा भीषण अपघात
मिळालेल्या माहितीनुसार, डबल डेकर बस (UP95 T 4720) बिहारमधील मोतिहारीहून दिल्लीला येत होती. पहाटे 5.15 च्या सुमारास उन्नावच्या बेहता मुजावर पोलीस ठाण्याच्या हद्दीतील गधा गावात बस पोहोचली, तेव्हा पाठीमागून दुधाने भरलेल्या भरधाव टँकरने तिला ओव्हरटेक केले आणि यादरम्यान बसची धडक बसली.
हा अपघात एवढा भीषण होता की डबल डेकर बसचा चक्काचूर झाला. ज्या ठिकाणी अपघात झाला त्या ठिकाणी मृतदेहांचा ढीग होता. पहाटे झालेल्या या अपघाताने परिसरात एकच खळबळ उडाली आहे. पोलीस पथक घटनास्थळी पोहोचले आणि जखमींना रुग्णालयात दाखल केले.
उन्नावचे डीएम गौरांग राठी म्हणाले, “हा अपघात पहाटे 5.15 च्या सुमारास झाला. मोतिहारी, बिहार येथून येणाऱ्या एका खाजगी बसची दुधाने भरलेल्या टँकरला धडक झाली. या अपघातात 18 जणांचा मृत्यू झाला, तर 19 प्रवासी जखमी झाले. प्राथमिक तपासात असे दिसून आले आहे. सर्व जखमींवर उपचार सुरू आहेत.
अपघातात 18 ठार
या अपघाताची माहिती रस्त्याने जाणाऱ्यांनी पोलिसांना दिली. माहिती मिळताच बांगरमाऊचे निरीक्षक मोठ्या पोलीस फौजफाट्यासह घटनास्थळी पोहोचले. त्यांनी जखमींना उपचारासाठी बांगरमाळ सामुदायिक आरोग्य केंद्रात नेले. येथे डॉक्टरांनी 18 जणांना मृत घोषित केले. गंभीर जखमी प्रवाशांना डॉक्टरांनी लखनऊच्या ट्रॉमा सेंटरमध्ये पाठवले आहे. मृतांमध्ये 14 पुरुष, तीन महिला आणि एका लहान मुलाचा समावेश आहे.
